Նիդեռլանդներից ու Մեծ Բրիտանիայից ժամանած փորձագետները կայցելեն ՀՊՄՀ ու ԵՃՇՊՀ

PanARMENIAN.Net - ՀԲ-ի դրամաշնորհով բուհերում իրականացվում է փորձնական հավատարմագրման ծրագիր: Մասնագիտական կրթության որակի ապահովման ազգային կենտրոն հիմնադրամից հայտնում են, որ ծրագրի շրջանակներում փորձագիտական խմբերի այցերը Խ. Աբովյանի անվան հայկական պետական մանկավարժական ու Երևանի ճարտարապետության և շինարարության պետական համալսարաններ սկսված են:

Ձևավորված փորձագիտական 2 առանձին խմբերը, հիմնվելով միջազգային չափորոշիչների վրա, ուսումնասիրություններ են իրականացնելու հիշյալ բուհերում մինչև նոյեմբերի 4-ը: Միջազգային փորձագետները Նիդեռլանդներից և Մեծ Բրիտանիայից են: Դոկտոր Կլաաս վան Վեենը Նիդեռլանդների Լեյդենի համալսարանի պրոֆեսոր է, երկար տարիներ զբաղվել է ուսուցիչների և դասախոսների վերապատրաստման աշխատանքների կազմակերպման և որակի գնահատման հարցերով: Ռիչարդ Լուիսը Վաշինգտոնի համալսարանում հրավիրված պրոֆեսոր է եղել, նաև Բարձրագույն կրթության ոլորտում որակի ապահովման գործակալությունների միջազգային ցանցի (INQAAHE) նախկին նախագահ:

Այցից հետո արդեն փորձագետները կամփոփեն դիտարկման արդյունքները, և խմբի ղեկավարը կներկայացնի վերջնական զեկույցը: ՀԲ-ի դրամաշնորհով փորձնական հավատարմագրման ծրագիրը կիրականացվի հանրապետության 14 բուհերում: