Դևիդ Քեմերոնը կոչ է արել ՖԻՖԱ նախագահին հրաժարական տալ ռասիզմի վերաբերյալ արտահայտությունների համար

PanARMENIAN.Net - Մեծ Բրիտանիայի վարչապետ Դևիդ Քեմերոնը կոչ է արել ՖԻՖԱ նախագահ Յոզեֆ Բլատերին հրաժարական տալ ռասիզմի վերաբերյալ իր արտահայտությունների համար, որոնք Մեծ Բրիտանիայում ընկալվել են որպես հանդուրժողականություն այդ երևույթի հանդեպ:

«Դա նողկալի է, երբ մարդիկ համարում են, որ ռասիզմը ցանկացած դրսևորմամբ կարող է ընդունելի համարվել, որպես խաղի մի մաս: ՖԻՖԱ-ի ղեկավարը պետք է ցույց տար, որ ռասիզմն անընդունելի է սպորտում և ընդհանուր առմամբ հասարակության մեջ: Եթե մարդիկ պատրաստ չեն դա անել, նշանակում է, պետք է հեռանան պաշտոնից»,-Կեմերոնի խոսքերն է մեջբերում newsru.com-ը:

Ըստ Բրիտանիայի վարչապետի, համաշխարհային ֆուտբոլային ընտանիքը պետք է լավ մտածի, կկարողանա արդյոք Բլատերը ներկայացնել այն արժեքները, որ անհրաժեշտ են այս գլոբալ խաղում:

Նոյեմբերի 16-ին Յոզեֆ Բլատերը հայտարարել է, որ խաղի ժամանակ ռասիստական վիրավորանքի ենթարկված ֆուտբոլիստները պետք է մոռանան այդ մասին խաղից հետո և ձեռք մեկնեն իրենց վիրավորողին, ինչպես դա արվում է դաշտում այլ կոպտությունների դրսևորման պարագայում:

Ֆուտբոլի անգլիացի երկրպագուները չեն կարողանում ներել Բլատերին այն, որ նախորդ տարվա ավարտին ՖԻՖԱ-ն 2022թ. առաջնության անցկացման իրավունքը տվեց ոչ թե Անգլիային , այլ Քաթարին: Բրիտանական մամուլը ՖԻՖԱ-ին մեղադրեց կոռուպցիայի մեջ և հենց դրանով է բացատրում Անգլիայի հայտի անհաջողությունը: