Նեջեթ Օզել. Թուրքիան կոչնչացնի Քրդական բանվորական կուսակցությանը

PanARMENIAN.Net - Թուրքիան կոչնչացնի Քրդական բանվորական կուսակցությանը (ՔԲԿ) և դրանով իսկ կհանի այդ հարցն օրակարգից, հայտնել է Թուրքիայի ԶՈՒ Գլխավոր շտաբի պետ Նեջեթ Օզելը, հաղորդում է Haber7 թերթը: «Թուրքիան նկատելի արդյունքների է հասել ահաբեկչության դեմ պայքարում, և այդ հարցում կարևոր էր հետախուզության և ուժային կառույցների գործողությունների համակարգումը»,- ասել է Օզելը: Գլխավոր շտաբի պետի խոսքով` վերջին վեց ամսվա ընթացքում Թուրքիայի անվտանգության ուժերը վնասազերծել են 327 ահաբեկիչների, որոնցից ոչնչացվել են 165-ը, ձերբակալվել` 50-ը: Եվս 112 ահաբեկիչներ իրենք են հանձնվել իշխանություններին:

Բացի այդ, Օզելի խոսքով, Իրաքի տարածքում հատուկ գործողությունների ընթացքում Թուրքիայի ՌՕՈՒ-ն ոչնչացրել է 325 և վիրավորել 320 մարտիկների:

Օզելը հիշեցրել է, որ դեռևս 2008թ. հոկտեմբերին Թուրքիայի, Իրաքի և ԱՄՆ կողմից ահաբեկչության դեմ պայքարի միասնական մեխանիզմ էր ստեղծվել, սակայն այդ համաձայնությունը նկատելի արդյունք չտվեց: Ավիահարվածները ՔԲԿ-ին վերսկսվեցին անցյալ տարվա օգոստոսի 17-ի երեկոյան Թուրքիայի հարավ-արևելքում մարտիկների ձեռնարկած գրոհից հետո, որի ընթացքում ինը թուրք զինվորներ սպանվեցին:

Թուրքիայի հակամարտությունը ՔԲԿ-ի հետ, որը պահանջում է անկախ քրդական պետության ստեղծում, տևում է արդեն 25 տարի և խլել է 40 հազար մարդու կյանք: ՔԲԿ-ն Եվրամիության և ՄԱԿ-ի կողմից ճանաչվել է ահաբեկչական կազմակերպություն: