ՀՀ գյուղատնտեսության նախարարություն. Առատ ձյունը բերքին չի վնասի

PanARMENIAN.Net - Առատ ձյունը, որն արդեն մի քանի օր է չի դադարում հանրապետության ողջ տարածքում, բերքին չի վնասի, փետրվարի 10-ին Երևանում կայացած մամուլի ասուլիսին հայատարարել է ՀՀ գյուղատնտեսության նախարար Սերգո Կարապետյանը:

«Առատ ձյուն` առատ բերք»,-ասել է նա: Ըստ նրա, առատ ձյունը կլցնի ջրամբարները, ինչը թույլ կտա խուսափել ոռոգման խնդիրներից: Միաժամանակ նախարարն ընդգծել է, որ առաջիկայում ցրտահարության վտանգ չկա, որը կսպառնա բերքին:

Ամփոփելով տարին` Սերգո Կարապետյանը ընդգծել է, որ 2011թ արտադրված գյուղատնտեսական արտադրանքի համախառն ծավալը 825.2 մլրդ դրամ է, ինչը 14.1 տոկոսով ավելի է 2010թ ցուցանիշից: Ինչպես ասել է նախարարը, աճ գրանցվել է ոլորտի բոլո ճյուղերում: «2011-ը որոշիչ էր, քանի որ կարողացանք վերականգնել ոլորտը` կրկնակի անկումից հետո: Իսկ 2012-ը լինելու է զարգացման տարի»,-հայտարարել է նախարարը:

Անդրադառնալով տարվա առաջնային խնդիրներին` նա առանձնացրել է բոլոր ճյուղերում կոոպերատիվների ստեղծումը, գյուղատնտեսական տեխնիկայի բազայի թարմացումը և սննդի` ԵՄ ստանդարտներին համապատասախնեցումը: