Հայաստանի վարչապետ Անդրանիկ Մարգարյանը ապրիլի 15-ին մեկնել է Բիշքեկ` մասնակցելու ԱՊՀ անդամ պետությունների կառավարությունների ղեկավարների խորհրդի նիստին: Ինչպես հաղորդեցին ՀՀ կառավարության մամլո ծառայությունում, ենթադրվում է, որ հանդիպման ընթացքում ԱՊՀ երկրների վարչապետները կստորագրեն փորձագետների կողմից մշակված եւ համաձայնեցված ավելի քան քսան փաստաթուղթ տրանսպորտային, էներգետիկայի, ֆինանսների եւ տեղեկատվական ոլորտներում: Մասնավորապես, ակնկալվում է Համագործակցության երկրներ ներմուծվող հնարավոր վտանգ պարունակող արտադրանքի առողջապահական գնահատման հարցում փոխգործակցության կարգի վերաբերյալ համաձայնագրի, Համագործակցության երկրների միջեւ փոխադարձ առեւտրում սահմանափակումների փուլային վերացման մասին որոշումների ստորագրում: Համաժողովի շրջանակներում հնարավոր են Ա.Մարգարյանի երկկողմ հանդիպումները ԱՊՀ մի շարք երկրների կառավարությունների ղեկավարների հետ, նշել են ՀՀ կառավարությունում: