Հայաստանի Նախագահ Ռոբերտ Քոչարյանը այսօր հրամանագիր է ստորագրել Կոռուպցիայի դեմ պայքարի խորհուրդ ստեղծելու մասին: Երկրի վարչապետ Անդրանիկ Մարգարյանի նախագահությամբ Խորհրդի կազմում ընդգրկվել են խորհրդարանի եւ կառավարության անդամներ, գլխավոր դատախազը, Կենտրոնական բանկի նախագահը, երկրի նախագահի եւ Ազգային Ժողովի վերահսկողական ծառայությունների ներկայացուցիչներ: Ինչպես հաղորդել են ՀՀ նախագահի մամլո ծառայությունում, Խորհրդը կհամակարգի Հայաստանի հակակոռուպցիոն ռազմավարության ծրագրի իրականացման աշխատանքները եւ դիտարկումներ կիրականացնի դրանց նկատմամբ, կհետեւի երկրի միջազգային պարտավորություններից բխող միջոցառումների իրականացմանը, կապահովի կոռուպցիայի դեմ պայքարի գործընթացում տարածաշրջանային եւ միջազգային կազմակերպությունների հետ համագործակցությունը: