Ադրբեջանում կայանալիք ՆԱՏՕ-ի «Համատեղ լավագույն ջանք-2004» զորավարժություններին կմասնակցեն յոթ հայ սպաներ: Այդ մասին երեկ Երեւանում լրագրողներին է հայտարարել Հայաստանի պաշտպանության նախարար Սերժ Սարգսյանը: Նշենք, որ ավելի վաղ Հայաստանի զինված ուժերի գնդապետ Մուրադ Իսախանյանը, որը նախորդ շաբաթ Բաքվում մասնակցում էր այդ զորավարժությունների ծրագրման կոնֆերանսին, հայտարարել էր, որ Ադրբեջանը թվային սահմանափակում չի դնում հայ սպաների համար, որոնք մասնակցելու են Բաքվում կայանալիք ՆԱՏՕ-ի զորավարժություններին: Նրա խոսքերով, մինչեւ հուլիսի 10-ը զորավարժությունների կազմակերպիչներին կներկայացվի այն հայ սպաների ցուցակը, որոնք մասնակցելու են զորավարժություններին: Նշենք, որ ՆԱՏՕ-ի «Գործընկերություն հանուն խաղաղության» ծրագրի շրջանակներում կայանալիք բազմազգ զորավարժությունները տեղի կունենան սեպտեմբերի 14-26-ը: