Երեկ տեղի ունեցած «Բազմազանության» շքերթի հակաերթը պետության կողմից կազամկերպված սադրանք էր: Այս մասին մամլո ասուլիսի ժամանակ ասաց Հելսինկյան ասոցիացիայի երևանյան գրասենյակի ղեկավար Միքայել Դանիելյանը:
Նրա կարծիքով, Հայաստանում առհասարակ չկա հանդուրժողականություն, հատկապես իրավապահների, քաղաքական գործիչների ու լրագրողների շրջանում: Դանիելյանի կարծիքով, դա պետության կողմից արվող առաջին քայլերն են, որը Հայաստանին կտանի դեպի անդունդ:
Դանիելյանի ենթադրությամբ, իշխանություններն այդ քայլին գնացել են մայիսի 6-ին տեղի ունեցած խորհրդարանական ընտրությունները մոռացության մատնելու համար, որովհետև, նրա կարծիքով, այդ օրը ցույց տվեց, որ մեր երկրում ժողովրդավարությունը բացակայում է:
ՄԱԿ-ի հայաստանյան գրասենյակի ներկայացուցիչ Գյուլնարա Շահինյանը գտնում է, որ մշակութային բազմազանություն պետք է լինի ցանկացած երկրում, և երեկ տեղի ունեցած միջադեպը պետք է մտածելու առիթ տա:
Այն հարցին, թե ում դեմ էր հակաշքերթը` սեռական փոքրամասնությունների թե մշակութային բազմազանության, Շահինյանն ասաց, որ ինֆորմացիան սխալ է հասկացվել, և այն դեմ էր սեռական փոքրամասնություններին:
Կանանց ռեսուրսների կենտրոնի ներկայացուցիչ Գոհար Շահնազարյանը դժվարացավ պատասխանել լրագրողների այն հարցին, թե կային արդյոք շքերթի մասնակիցների մեջ սեռական փոքրամասնությունների ներկայացուցիչներ: Նա ասաց, որ երթը ուղղված էր մշակութային բազմազանությանը, և նա չի հարցրել շքերթի մասնակիցների սեռական կողմնորոշումը:
Գրող Մարինե Պետրոսյանը, համաձայնվելով բանախոսների հետ, ասաց, որ հստակ չգիտի, թե ով է հակաերթի կազմակերպիչը, սակայն որպես կատարող մատնացույց արեց բլոգեր Տիգրան Քոչարյանին (Փիղ):
