Երևանի Հ.Շիրազի անվան 169 դպրոցում այսօր անցկացվել է «Դպրոցական սնունդը Հայաստանում` ինչու՞ է այն անհրաժեշտ» խորագրով սեմինար:
Ինչպես PanARMENIAN.Net-ին հայտնում են Հայաստանում Ռուսհամագործակցության ներկայացուցչության մամուլի գրասենյակից` սեմինարը կազմակերպվել է Մոսկվայի Ճյուղային սննդի ինստիտուտի` Հայաստանում Ռուսհամագործակցության ներկայացուցչության, Երևանի քաղաքապետարանի, Հայաստանի Հանրապետության կրթության և գիտության նախարարության և ՄԱԿ-ի Համաշխարհային պարենային ծրագրի երևանյան գրասենյակի օժանդակությամբ:
Սեմինարին մասնակցել են Հայաստանի դպրոցների և ծնողկոմիտեների ավելի քան 100 ներկայացուցիչներ:
Սեմինարի ընթացքում քննարկվել է Հայաստանում, մասնավորապես Երևանում, դպրոցական սննդի զարգացման հայեցակարգը:
ՄԱԿ-ի Համաշխարհային պարենային ծրագրի երևանյան գրասենյակի համակարգող Լիանա Խառատյանը հավաքվածներին պատմել է հանրապետության 700 գյուղական դպրոցների 50 հազար դպրոցականների համար նախատեսված դպրոցական սննդի նախագծի մասին:
Ճյուղային սննդի ինստիտուտի գիտական աշխատանքի գծով տնօրեն Սերգեյ Մասլովը պատմել է Հայաստանում դպրոցական սննդի զարգացման ուղղությունների մասին, իսկ Ճյուղային սննդի ինստիտուտի երևանյան մասնաճյուղի ղեկավար Մելքոն Գասպարյանը` դպրոցական սննդի փորձնական նախագծերի մասին:
