ԱԳ նախարարի տեղակալ Ռուբեն Շուգարյանն այսօր ընդունել է Շվեյցարիայի Դաշնային պաշտպանության նախարարության սպառազինությունների վերահսկման վարչության պետ Բեռնար Ջենթիի եւ Ֆինլանդիայի զինված ուժերի սպառազինությունների վերահսկման վարչության տնօրեն Ալեքսանդր Ամինոֆֆի գլխավորած պատվիրակությանը: Ինչպես տեղեկացրել է ԱԳՆ մամուլի ծառայությունը, պատվիրակությունը Երեւան է ժամանել ԵԱՀԿ «Փոքր սպառազինությունների եւ թեթեւ զենքերի» փաստաթղթի շրջանակներում համագործակցություն հաստատելու, մասնավորապես, Հայաստանում համատեղ ծրագրի իրականացման հնարավորություններն ուսումնասիրելու նպատակով: Հանդիպման ընթացքում Ռ.Շուգարյանը հյուրերին ներկայացրել է Փոքր սպառազինությունների եւ թեթեւ զենքերի բնագավառում Հայաստանի միջազգային հանձնառությունների կատարման ընթացքը եւ երկրի կողմից կողմից այդ ուղղությամբ ձեռնարկած միջոցառումները: Զրույցի ընթացքում քննարկվել են նաեւ հետագա համագործակցության ու համատեղ ծրագրերի իրագործման հեռանկարները: