Նախագահ Ռոբերտ Քոչարյանն այսօր ընդունել է Ֆինլանդիայի արտգործնախարար Էրկկի Տուոմիոյային, որը տարածաշրջանային այցով գտնվում է Հարավային Կովկասի երկրներում: Ինչպես հաղորդել են պետության ղեկավարի մամլո ծառայությունում, Ռ.Քոչարյանը կարեւորել է Ֆինլանդիայի ԱԳՆ ղեկավարի այցը ինչպես Հայաստանի եվրոպական քաղաքականության շրջանակում, այնպես էլ երկկողմ քաղաքական եւ տնտեսական հարաբերությունների ակտիվացման համատեքստում: Հանդիպման ընթացքում Հայաստանի նախագահը եւ Ֆինլանդիայի ԱԳՆ ղեկավարը քննարկել են իրավիճակը Հարավային Կովկասի տարածաշրջանում: Կողմերը կարեւորել են տարածաշրջանի երկրների ընդգրկումը ԵՄ «Ընդարձակ Եվրոպա. նոր հարեւաններ» ծրագրի մեջ: Բացի այդ զրուցակիցները մտքեր են փոխանակել նաեւ տարածաշրջանային զարգացումների վերաբերյալ, մասնավորապես, քննարկել են ղարաբաղյան հակամարտության կարգավորման գործընթացը եւ Հայաստան-Թուրքիա հարաբերությունները: