«Ընտրական գործընթացի երկրորդ փուլն ստվերելու համար հակառակ կողմը ապատեղեկատվության նպատակով շրջանառության մեջ է դրել կեղծ եւ չհիմնավորված լուրեր», ասվում է ՀՀ նախագահի թեկնածու, երկրի գործող ղեկավար Ռոբերտ Քոչարյանի նախընտրական շտաբի այսօր տարածած հայտարարության մեջ: Միեւնույն ժամանակ, այնտեղ նշվում է, որ Ռ. Քոչարյանի վստահված անձինք հաղորդում են մրցակից թեկնածուի վստահված անձանց եւ համակիրների ապօրինի գործողությունների եւ վերջիններիս կողմից տեղամասային հանձնաժողովների աշխատանքները կազմալուծելու փորձերի մասին: Համապատասխան փաստերի հիման վրա կազմվել են արձանագրություններ եւ փոխանցվել ՀՀ Կենտրոնական ընտրական հանձնաժողով: «Այդուհանդերձ, Ռ. Քոչարյանի շտաբը գտնում է, որ արձանագրված խախտումները չէին կարող ազդել ընտրական ողջ գործընթացի վրա»,-ասվում է հայտարարության մեջ: Այնտեղ նշվում է նաեւ, որ մինչեւ Հայաստանի ԿԸՀ-ի կողմից քվեարկության նախնական արդյունքների հրապարակումը,
շտաբը ձեռնպահ կմնա հավելյալ մեկնաբանություններից: