24 մարտի 2005 - 09:57 AMT
ՀԱՅԱՍՏԱՆԻ ԵՐԻՏԱՍԱՐԴԱԿԱՆ ԿԱԶՄԱԿԵՐՊՈՒԹՅՈՒՆՆԵՐԸ ՊԱՀԱՆՋՈՒՄ ԵՆ ՉԵՂՅԱԼ ՀԱՅՏԱՐԱՐԵԼ ՖԻԼԻՊ ԿԻՐԿՈՐՈՎԻ ՀԱՄԵՐԳԸ ԵՐԵՎԱՆՈՒՄ
Այսօր Հայաստանի երիտասարդական կազմակերպությունները բողոքի նամակ են հղել Ֆիլիպ Կիրկորովի երեւանյան համերգի կազմակերպիչներին: Նամակում հեղինակները կոչ են արել կանխել համերգի անցկացումը: Որպես հիմնավորում ուղերձում նշվում է այն փաստը, որ Կիրկորովը ունի բացահայտ հակահայկական եւ նույնսիկ թուրքամետ դիրքորոշում եւ, բացի այդ, վերջերս հրապարակայնորեն վիրավորել էր հայ լրագրողուհուն` քամահրանքով ընդգծելով նրա ծագումը: Բողոքի նախաձեռնողները գտնում են, որ թուրքական երգերը պրոպագանդող երգչի հրավերը Հայաստան Հայոց ցեղասպանության 90-ամյակի նախօրեին անբարոյական քայլ է: Համերգից ակնկալվող հասույթը անհամեմատելի է այնպիսի բարոյական արժեքների հետ, ինչպիսիք են ազգային եւ մարդկային արժանապատվությունը: Երիտասարդական կազմակերպությունների ներկայացուցիչները նշել են, որ այն դեպքում, եթե Կիրկորովի համերգը չեղյալ չհայտարարվի, նրանք իրենց իրավունք են վերապահում ձեռնարկել գործնական միջոցներ համերգը խափանելու նպատակով: