ԵԽԽՎ-ում հայկական պատվիրակության ղեկակավար Դավիթ Հարությունյանը մեկնաբանել է «Բարգավաճ Հայաստան» կուսակցության պատգամավորներ Նաիրա Զոհրաբյանի և Վահե Հովհաննիսյանի հայտարարությունը, որ նրանք պատրաստ են անհրաժեշտության դեպքում ԵԽԽՎ հայկական պատվիրակության կազմում իրենց տեղը զիջել Վարդան Օսկանյանին, հասկանալով, որ ԵԽԽՎ պատգամավորի կարգավիճակը նրան լրացուցիչ անձեռնմխելիություն է տալիս:
Հարությունյանի խոսքով, յուրաքանչյուր քաղաքական ուժի գործն է ընտրել իր ներկայացուցիչներին ԵԽԽՎ հայկական պատվիրակության կազմում:
Լրագրողների հարցին, թե ԵԽԽՎ-ում ինչպիսին է նախնական կարծիքը Վարդան Օսկանյանի գործի մասին, հայկական պատվիրակության ղեկավարը պատասխանել է. «Նախնական կարծիք չկա: Բայց այն, որ այն կլինի ԵԽԽՎ ուշադրության կենտրոնում, ակնհայտ է»:
Հոկտեմբերի 2-ին ԱԺ-ն բավարարեց գլխավոր դատախազ Աղվան Հովսեփյանի միջնորդությունը ԲՀԿ խորհրդարանական խմբակցության անդամ, ԱԳ նախկին նախարար Վադան Օսկանյանին «Սիվիլիթաս» հիմնադրամի միջոցների յուրացման քրեական գործի շրջանակներում պատգամավորական անձեռնմխելիությունից զրկելու մասին:
