Սիրիայում, հատկապես Հալեպում, կյանքի համար անտանելի պայմաններ են: Մեծ թվով հայեր ուզում են հեռանալ երկրից` այդ թվում դեպի Հայաստան, բայց չեն կարողանում՝ ճամփորդական փաստաթղթեր չունենալու պատճառով: Այս մասին PanARMENIAN.Net-ին տեղեկացնում են «Հայազն» միությունից:
Ելքի իրավունքով անձնագիր տրամադրող սիրիական իրավասու մարմինները վաղուց չեն գործում: Հայաստանի պաշտոնատարները բազմիցս պնդել են, թե իրավիճակի վատթարացման դեպքում, հայրենակիցների փրկության նպատակով պատրաստ են արտակարգ քայլեր ձեռնարկել: Դրանք մեծամասամբ արդեն ուշացած են և մեր հայրենակիցները թողնված են բախտի քմահաճույքին:
Բազմաթիվ սիրիահայեր ՀՀ քաղաքացու անձնագրի կարիք ունեն: Ձգձգումը կարող է ողբերգական հետևանքներ ունենալ բազմաթիվ ընտանիքների համար:
«Պահանջում ենք հատուկ պայմաններով շտապ ՀՀ քաղաքացու անձնագրեր տրամադրել Սիրիայում գտնվող և այնտեղից հեռանալ ցանկացող հայ ընտանիքներին», - ասված է Հայազն Միության տարածած հայտարարության մեջ:
