Վլադիմիր Ճաղարյան. Պեղումների արդյունքում հուշարձանները զգալի վնաս են կրում
Հայաստանում պեղումների արդյունքում հայտնաբերված հուշարձանների կոնսերվացման պետական ծրագիր չկա: Այս մասին լրագրողներին ասաց «Շենգավիթ» պատմահնագիտական արգելոցի տնօրեն Վլադիմիր Ճաղարյանը:
Նրա խոսքով, այս խնդիրը ամենացավոտներից է, քանի որ դրա համար գումարներ չեն տրամադրվում: «Շենգավիթը» պեղվում է 1936 թվականից և զգալի կորուստներ է կրել: 60- ական թվականներին հնավայրի մի հատվածը բետոնապատվել է, որը մասնակի լուծել է այդ խնդիրը:
Այսօր, ըստ Ճաղարյանի, պեղված շինությունները փակվում են հողով և պոլիէթիլենով, որի արդյունքում էլ կարող է առաջանալ փտում:
Ճաղարյանը նշեց, որ այդ խնդիրը միայն «Շենգավիթին» չի վերաբերվում, նույն պատկերն է արձանագրված Արտաշատում, Լճաշենում և մնացած այլ վայրերում:
