«Հայէլեկտրո» գործարանի հանրակացարանում ապրող բնակիչներն այս պահին հավաքվել են ՀՀ նախագահի նստավայրի դիմաց:
Գործարանին պատկանող շենքի 62 ընտանիքները կարող են մնալ առանց տանիքի, քանի որ գործարանի սեփականատերը ՊԵԿ-ին ունեցած պարտքերի պատճառով աճուրդի է դրել հանրակացարանը, իսկ այնտեղ ապրող բնակիչներից որևէ մեկը սեփականատեր չէ:
Բնակիչները PanARMENIAN.Net-ի թղթակցի հետ զրույցում պատմել են, որ շենքն աճուրդի է հանվել որպես արտադրամաս և փաստաթղթերում նշված չէ, որ այնտեղ մարդիկ են ապրում:
«ՀայԷլեկտրո» գործարանին պատկանող 5 հարկանի շենքում ապրում են գործարանի նախկին աշխատողներ և փախստականներ։
Նշենք, որ բնակիչներին մեկ ամիս առաջ ընդունել էր կառավարության Քաղաքացիների ընդունելության և դիմումների քննարկման վարչության պետ Ալեքսանդր Ղազարյանը։ Նա ասել էր, որ կփորձեն խնդրին օրենքի սահմաններում լուծում գտնել:
