ԱՄՆ Պետդեպարտամենտի պաշտոնական ներկայացուցիչ Ադամ Էրելին հայտարարել է, որ ԱՄՆ դիրքորոշումը «1,5 միլիոն հայերի բռնի արտաքսման եւ սպանության» վերաբերյալ չի փոփոխվել: Այդ մասին նա հայտարարել է` մեկնաբանելով ԱՄՆ Կոնգրեսի Ներկայացուցիչների Պալատի միջազգային հարաբերությունների կոմիտեի կողմից 1915 թվականի Հայոց ցեղասպանությանը վերաբերող երկու բանաձեւերի ընդունումը: «ԱՄՆ քաղաքականությունն այս հարցում չի փոփոխվել: ԱՄՆ նախագահը հստակ հնչեցրել է այն ապրիլի 24-ի իր հայտարարությունում` ասելով, որ ԱՄՆ ողբում են Օսմանյան կայսրության գոյության վերջին տարիներին մոտ 1,5 միլիոն հայերի բռնի արտաքսման եւ սպանության համար` այդ իրադարձությունները համարելով մարդկության պատմության մեծագույն ողբերգություններից մեկը: ԱՄՆ ակտիվորեն աջակցում են 1915 թվականի բռնի արտաքսման եւ սպանությունների քննարկումներին գիտնականների, քաղաքացիական հասարակության ներկայացուցիչների եւ դիվանագետների կողմից` նպատակ ունենալով օգնել կողմերին միասնական կարծիքի գալ այդ ահավոր իրադարձությունների վերաբերյալ: ԱՄՆ վարչակազմը չի պաշտպանում բանաձեւերի քվեարկությունը Ներկայացուցիչների Պալատում, եւ մենք շարունակում ենք հստակ հայտարարել այդ մասին: Մեր դիրքորոշումը մնում է նույնը, ինչպիսին եղել է միշտ», - հայտարարել է Ա. Էրելին, տեղեկացնում է «Մեդիամաքս» գործակալությունը: