Հայ ազգային կոնգրես խմբակցության մեջ կան մարդիկ, ովքեր պայքարում են Ազատության հրապարակում այսօր ընթացող շարժման դեմ: Նման կարծքի է «Ժառանգության» փոխնախագահ, խմբակցության ղեկավար Ռուբեն Հակոբյանը: Այսօր Ազատության հրապարակում մամուլի ասուլիսի ժամանակ նա ասաց, որ ՀԱԿ խմբակցության մեջ իրենք ունեն շատ լավ ընկերներ, բայց այդ խմբակցության որոշ ներկայացուցիչների գնահատականները չեն տարբերվում ՀՀԿ-ականների հնչեցրածներից:
Ռուբեն Հակոբյանը միևնույն ժամանակ նշեց, որ Երևանի ավագանու ընտրություններին իրենք պատրաստ են համագործակցել ՀԱԿ-ի հետ, բայց նաև խորհուրդ տվեց իշխանությունների հետ միասին չլծվել` հարվածելու շարժմանը և Րաֆֆի Հովհաննիսյանին:
Անդրադառնալով շարժմանը, նա նշեց, որ իրենք իրենց չափով կարողացել են պահել հանդուրժողականության մթնոլորտը, համագործակցել են նաև ոստիկանության հետ: «Այս շարժման հիմնական նվաճումներից մեկն այն է, որ հարթակը չմենաշնորհվեց, այդտեղ հայտնվեցին ամենատարբեր կողմնորոշում ունեցող գործիչներ, բոլորը հնարավորություն ունեցան խոսել քաղաքական ծրագրերից»,- ասաց Ռուբեն Հակոբյանը:
