Հայաստանի արտգործնախարար Վարդան Օսկանյանը նախօրեին հայտարարել է, որ ԱՄՆ-ի «Հազարամյակի մարտահրավերների» ծրագրում Հայաստանի ընդգրկվելը վկայությունն է այն փաստի, որ Միացյալ Նահանգները հավատում է իշխանությունների կողմից իրականացվող ժողովրդավարական բարեփոխումներին: «Մենք նման մեծ գումարներ ենք ստանում Միացյալ Նահանգներից, որովհետեւ նրանք հավատում են Հայաստանի ապագային: Միայն 16 երկներ են ստանում նման գումարներ, այն երկներիը 120-ից, որոնք բռնել են ժողովրդավարության ճանապարհը եւ ռեսուրսներ են տրամադրում հասարակության զարգացմանը», - Սահմանադրական փոփոխությունների հանրաքվեի շուրջ հասարակական քննարկումների ընթացքում իր ելույթում նշեց Հայաստանի արտգործնախարարը:

Այս համատեքստում, ըստ նախարարի, Հայաստանի Սահմանադրական բարեփոխումներն արդեն առավել իմաստ են ստանում, եւ նոյեմբերի 27-ին Հայաստանը լինելու է աշխարհի ուշադրության կենտրոնում. «Կոչ եմ անում բոլորիդ, նաեւ ձեր շրջապատին` նոյեմբերի 27-ին «այո» ասել այս Սահմանադրությանը, քանի որ այն երկարաժամկետ առումով ուղղակիորեն ազդելու է մեր բոլորի կայնքի վրա»: Հայաստանում Միացյալ Նահանգների դեսպան Ջոն Էվանսը «Հազարմյակի մարտահրավերների» նախատեսվող աջակցությունը որեւէ կերպ չկապեց մեր երկրում ըթնացող բարեփոխումների հետ. «Միացյալ Նահանգներն ուզում է, որ Հայաստանը հաջողակ լինի: Հայաստանին հաջողվել է ներկայացնել լավ առաջարկ գյուղական բնակավայրերը աղքատությունից հանելու վերաբերյալ», - շեշտեց դեսպան Էվանսը` ավեալցնելով, թե այս տարիների ընթացքում ԱՄՆ-ը Հայաստանին ընդհանուր առմամբ 1,6 միլիարդ դոլարի աջակցություն է ցուցաբերել, հաղորդում է «Ազատություն» ռադիոկայանը:

Հիշեցնենք, որ «Հազարամյակի մարտահրավերներ» կորպորացիայի Տնօրենների խորհուրդը նոյեմբերի 8-ի նիստում կրկին անվանել էր Հայաստանը «Հազարամյակի մարտահրավերներ» հիմնադրամի 2006 ֆինանսական տարում ֆինանսավորմանը համապատասխանող երկիր: Հայաստանի կառավարությունը ակնկալում է ծրագրի շրջանակներում ստանալ 175 միլիոն դոլար, որի առյուծի բաժինը (118 միլիոնը) ծրագրում է ծախսել ոռոգման համակարգի, իսկ մնացած գումարը` մարզերում ավտոճանապարհների վերականգնման վրա: