Հայաստանի նախագահ Ռոբերտ Քոչարյանին այսօր իր հավատարմագրերն է հանձնել ՀՀ-ում Հնդկաստանի նորանշանակ դեսպան Րինա Պանդեյը, հաղորդում է նախագահի մամլո ծառայությունը: Հանդիպման ընթացքում նախագահը նշել է, որ Հայաստանն ավանդաբար ջերմ վերաբերմունք ունի հնդիկ ժողովրդի ու նրա մշակույթի հանդեպ, եւ նաեւ դրանով է պայմանավորված հայ-հնդկական հարաբերությունների ներդաշնակ բնույթը: Իր հերթին, Րինա Պանդեյը ասել է, որ Հայաստան է եկել դրական մեծ զգացումներով եւ պաշտոնավարման ընթացքում մտադիր է նպաստել հատկապես տնտեսական կապերի ընդլայնմանը` մեծ ուշադրություն դարձնելով փոքր եւ միջին բիզնեսի ոլորտին: Ռոբերտ Քոչարյանը վստահեցրել է, որ տիկին Պանդեյն իր նախաձեռնություններում կարող է ակնկալել հայկական կողմի աջակցությունը: