«Երկրաշարժերի կանխատեսման հնարավորության, սեյսմիկության և կլիմայի փոփոխության կորելյացիայի համալիր հետազոտում» համաեվրոպական նախագիծի շրջանակներում, փորձի փոխանակման նպատակով, հուլիսի 2-18-ը Սոֆիա` Բուլղարիայի գիտությունների ակադեմիայի Երկրաբանության, երկրաֆիզիկայի և աշխարհագրության գիտահետազոտական ինստիտուտ էին գործուղվել ՀՀ ԱԻՆ «Սեյսմիկ պաշտպանության արևելյան ծառայություն» ՊՈԱԿ-ի (ԼՂՀ) գործադիր տնօրեն Բ. Պետրոսյանը և «Սեյսմիկ պաշտպանության հարավային ծառայություն» ՊՈԱԿ-ի գործադիր տնօրեն Ս. Բաղդասարյանը:
Նրանք ներկայացրել են բնակչության հետ տարվող աշխատանքների ոլորտին վերաբերող՝ «Ուժեղ երկրաշարժերից հետո սոցիալ-հոգեբանական հետևանքների վերացման մի շարք հիմնախնդիրներ», ինչպես նաև ուժեղ երկրաշարժերի կանխատեսման հիմնախնդրի ոլորտին առնչվող՝ «ԼՂՀ-ում իոնոսֆերային դիտարկումների փորձն ու արդյունքները» զեկույցները, որոնք արժանացել են ներկաների մեծ հետաքրքրությանը և փոխանցվել բուլղարական կողմին:
Միևնույն ժամանակ, հայ մասնագետներն այցելել են սեյսմիկ կայաններ և լաբորատորիաներ, ծանոթացել ԲԳԱ Երկրաբանության, երկրաֆիզիկայի և աշխարհագրության գիտահետազոտական ինստիտուտի կառուցվածքին, հիմնական գործառույթներին և ղեկավարների աշխատանքային փորձին, ուժեղ երկրաշարժերի դեպքում ազդարարման համակարգերի աշխատանքին և երկրաշարժի մասին տվյալների հաղորդման եղանակներին, Բուլղարիայում իրականացվող սեյսմակայուն շինարարության գործընթացին, ինչպես նաև բնակչության սեյսմիկ պաշտպանության բնագավառին առնչվող այլ խնդիրներին:
