Հայաստանում նախատեսվում է ստեղծել ռազմական օմբուդսմենի ինստիտուտ: Այդ մասին Երեւանում Starlink ծրագրի շրջանակներում անցկացվող սեմինարի ժամանակ հայտարարել է Հայաստանի պաշտպանության նախարարի տեղակալ, գեներալ-լեյտենանտ Արթուր Աղաբեկյանը: «Ռազմական օմբուդսմենի ինստիտուտը նախատեսված է պաշտպանական օրենսդրության բարեփոխումների շրջանակներում, որոնք նախատեսվում է սկսել 2008 թվականին եւ ավարտել 2010-ին»,-ասել է Ա.Աղաբեկյանը: Նրա խոսքերով, ռազմական օմբուդսմենը կզբաղվի հանրապետության Զինված ուժերի անձնակազմի խնդիրներով եւ բողոքներով: Բացի այդ, ինչպես նշել է փոխնախարարը, նախատեսվում են նաեւ ուղղումներ «Պաշտպանության մասին» օրենքում, որոնք կհստակեցնեն պաշտպանության նախարարության եւ Գլխավոր շտաբի գործառույթները, ինչպես նաեւ կբարեփոխվի իրավական համակարգը, որը նախատեսում է նաեւ բանակի ռազմական եւ քաղաքացիական կազմի սոցիալական պաշտպանություն, ռազմական արդարադատության համակարգի, կանոնադրությունների բարեփոխում: «Նախատեսվում է նաեւ մշակել «Ռազմական ոլորտի քաղաքացիական աշխատակիցների մասին» նոր օրենքը, որը կկանոնակարգի քաղաքացիական անձանց գործունեությունը Հայաստանի Զինված ուժերում»,-հաղորդել է Ա.Աղաբեկյանը, հաղորդում է ՌԻԱ «Նովոստին»: