Հայոց ցեղասպանությունը XX դարի առաջին ցեղասպանությունն էր, սակայն արդեն 1895 թ. թուրքերը հայերի կոտորած սարքեցին: Այդ մասին գրում է լրագրող Էրվե Ռուբեն Dreuz.info կայքում:
«Դարեր շարունակ թուրքերն ուղղակի պորտաբույծների նման էին ապրում՝ նստած այդ աշխատասեր ժողովրդի (հայերի) վզին: Նրանք հայերին իրենց օրենքներն էին պարտադրում, առևանգում էին նրանց ամենագեղեցիկ աղջիկներին իրենց հարեմների համար, քրիստոնյա տղաներին յենիչերների էին վերածում: Նպատակ չունեմ նկարագրելու սարսափելի կախվածությունն ու հալածանքները, որոնք 5 դար շարունակվեցին: Նպատակս է ընդգծել մահմեդական թուրքերի այն բնածին վերաբերմունքն այս ռասայի ու կրոնի մարդկանց հանդեպ, որոնք, ըստ նրանց, մարդկային էակներ չեն, այլ ուղղակի ստրուկներ, և կարող են անողոքաբար ոչնչացվել: Մարդկային կյանքի հանդեպ այդ համատարած քամահրանքն ու ֆիզիկական հաճույքը ցավ պատճառելուց բնորոշ է պրիմիտիվ ժողովրդի»,-մեջբերում է ֆրանսիացի լրագրողը Կոստանդնուպոլսում ԱՄՆ դեսպան Հենրի Մորգենթաուի խոսքերը:
Էրվե Ռուբեն նշում է, որ շուրջ 2 մլն հայեր ստիպված եղան լքել իրենց բնիկ հողերը կամ զոհվել: Ըստ նրա, դա նույնն է, ինչ այսօր ուզում է Եվրոպան Պաղեստինի հրեաների համար:
«1894-1896 թթ. 300 000-400 000 քրիստոնյա հայեր են սպանվել Աբդուլ Համիդի օրոք հատուկ կազմակերպված կազմավորումների՝ «համիդիե» ջոկատների ջարդերի հետևանքով: Աբդուլ Համիդին նաև կոչում են «Կարմիր սուլթան»՝ Օսմանյան կայսրության հայերի զանգվածային կոտորածների համար: 1895 թվականին գազանաբար 300 000 հայ սպանվեց, որոնք կայսրության ամենակրթված ու հարուստ քաղաքացիներն էին: Ձևականորեն ջարդն ուղղված էր «հայերի ազգայնական տրամադրությունների կասեցմանը», Աբդուլ Համիդը վախեցած էր հայ քաղաքական կուսակցությունների գործունեությունից: Նա ցանկանում էր կասեցնել այդ գործընթացը, բայց չէր համարում, ինչպես երիտթուրքերը, որ հայերը պետք է անհետանան որպես ժողովուրդ»,-գրում է Ռուբեն:
Հոդվածում բերված են Ֆրանսիայի, Մեծ Բրիտանիայի, Ռուսաստանի ներկայացուցիչների վկայությունները, որոնք բոլորը Աբդուլ Համիդի օրոք կատարված սպանությունները ցեղասպանություն են համարում: Բերվում է նաև ԱՄՆ նախագահ Գրովեր Քլիվլենդի 1895 թվականի դեկտեմբերի 2-ի դիմումը ԱՄՆ Կոնգրեսին, որը հայտարարեց, որ «Հայաստանում քրիստոնյաների կոտորածի մասին զեկույցները, ֆանատիկ թշնամանքը նրանց դեմ բնական վախ է ծնում տղամարդկանց ու կանանց անվտանգության համար»:
«Երբ 1896 թվականին ԱՄՆ-ն պահանջեց սուլթան Աբդուլ Համիդ Երկրորդից դադարեցնել հայերի հալածանքները, վերջինս իր պատասխանում ժխտեց մեղադրանքները, ինչպես անում է նրա հետնորդ Էրդողանը, նույնիսկ հայտարարելով, թե «Օսմանյան կայսրությունը հազարավոր մահմեդական փախստականների ընդունեց Բուլղարիայից ու Ռուսաստանից: Այպես թուքերը «ստեղծեցին Թուրքիա թուրքերի համար»,-գրում է Էրվե Ռուբեն:
