Երկարատև բանավեճից հետո Վրաստանի խորհրդարանը հաստատել է նոր կառավարության կազմը: Ճիշտ է, այն կարելի է նոր համարել միայն վերապահումով՝ գրեթե բոլոր նախարարները պահպանել են իրենց պաշտոնները: Փոխվել է միայն կառավարության ղեկավարը՝ նոր վարչապետն է Բիձինա Իվանիշվիլիի առաջարկած թեկնածուն՝ ՆԳՆ նախկին ղեկավար Իրակլի Ղարիբաշվիլին: Խորհրդարանի հաստատումից երկու ժամ անց վարչապետի նշանակման մասին հրամանագիրը ստորագրել է նաև Վրաստանի նորընտիր նախագահ Գեորգի Մարգվելաշվիլին:
Վրաստանի խորհրդարանը, որի կազմում 150 պատգամավոր է, 93 քվեով հաստատել է վարչապետի թեկնածությունը: Դեմ է եղել 19 պատգամավոր, հիմնականում նախկին նախագահ Սահակաշվիլիի «Միասնական ազգային շարժումից»:
Ընդդիմադիր պատգամավորները ծրագիրը ներկայացնող Ղարիբաշվիլիինբազում հարցեր են ունեցել, ինչի պատճառով նրա ելույթը շուտով վերածվել է լեզվակռվի: «Ազգային շարժման» պատգամավորները մեղադրել են նոր կառավարությանը տնտեսական անկման և օտարերկրացի ներդրողներին վանելու մեջ: Ղարիբաշվիլին տնտեսական խնդիրների առկայությունն ընդունել է, սակայն հայտարարել, որ նախագահի երդմնակալությունից հետո նախարարների նոր կաբինետը հեշտությամբ կլուծի դրանք:
Այնուհետև վարչապետը հակադարձել է ընդդիմադիրներին, որոնք դեռ մեկ տարի առաջ կառավարում էին երկիրը, մեղադրելով նրանց գործարարների դեմ ճնշում գործադրելու և պետական պարտքը ուռճացնելու մեջ: Այժմ, ըստ նրա, Վրաստանն ինքը կլուծի իր խնդիրները՝ չդիմելով օտարերկրյա ռեսուրսներին: Ղարիբաշվիլին նշել է, որ ԵՄ և ՆԱՏՕ-ի հետ ինտեգրման քաղաքականությունը կշարունակվի, քանի որ, «այդպիսին է վրաց ժողովրդի ցանկությունը», հայտնում է ВВС-ին:
Իրակլի Ղարիբաշվիլին 31 տարեկան է: Խորհրդարանի հաստատումից հետո նա դարձավ Վրաստանի ամենաազդեցիկ քաղաքական գործիչը, քանի որ վարչապետին անցավ նախագահի պարտականությունների մի մասը: Մասնավորապես, ներքին և արտաքին քաղաքականության կուրսը մշակում են վարչապետն ու խորհրդարանը: Ղարիբաշվիլիի նախկին պաշտոնը որպես ՆԳՆ ղեկավար ստանձնեց 28-ամյա Ալեքսանդր Չիկաիձեն, նա դարձավ ՆԳՆ ամենաերիտասարդ նախարարը Վրաստանի պատմության մեջ և ամենաերիտասարդ նախարարը Ղարիբաշվիլիի կառավարությունում:
Նախագահական ընտրությունները Վրաստանում տեղի ունեցան հոկտեմբերի 27-ին: Հաղթեց Գեորգի Մարգվելաշվիլին, որն ըստ ԿԸՀ հավաքեց ընտրողների 62,11 տոկոսը: Երդմնակալությունը տեղի ունեցավ նոյեմբերի 17-ին:
