Խոշորագույն ֆրանսիական ընկերությունների ներկայացուցիչների պատվիրակությունը կմեկնի Իրան՝ նպատակ ունենալով քննարկել ներդրումների հնարավորությունն այդ երկրում, եթե Արևմուտքը չեղյալ համարի Իրանի դեմ պատժամիջոցները: Այդ մասին հայտնում է ԻՏԱՐ-ՏԱՍՍ-ը Financial Times-ի վրա հղումով: Ֆրանսիայի և մյուս եվրոպական երկրների գործարարները ձգտում են ժամ առաջ տեղ գրավել հեռանկարային իրանական շուկայում, քանի դեռ այն չեն գրավել ամերիկացի մրցակիցները: Սա արևմտյան գործարարների ամենամեծ պատվիրակությունն է Իրան վերջին 10 տարում:

Ֆրանսիայի ֆինանսների նախարար Պիեռ Մոսկովիսին կիրակի օրը հայտարարել է՝ մեկնաբանելով այցը. «Եթե իրավիճակը փոխվի, Ֆրանսիան զգալի առևտրային հնարավորություններ կստանա Իրանում»:

Ֆրանսիական պատվիրակության կազմում են այնպիսի ընկերությունների պատվիրակությունները, ինչպիսիք են Total (նավթային), Alstom (մեքենաշինություն), Renault (ավտոմոբիլային արտադրություն), Orange (հեռահաղորդակցություններ), Lafarge (շինանյութեր): Ներկայացված է նաև խորհրդատվական ոլորտը, ակտիվների կառավարումը, սննդարդյունաբերությունը, նավաշինությունը, շինարարությունը, իրավաբանական ծառայությունները, ապահովագրությունը, գովազդը, դեղագործությունը, բանկերը:

Մինչդեռ պատվիրակության կազմում բացակայում են առաջատար ֆրանսիական ընկերությունները, որոնք գործում են միջուկային արդյունաբերության ոլորոտւմ՝ AREVA և EDF:

Այցի կազմակերպիչն է ֆրանսիական արդյունաբերողների ֆեդերացիան՝ MEDEF:

Մինչդեռ ԱՄՆ նախկին պետքարտուղար Հիլարի Քլինթոնը հայտարարել է, որ ԱՄՆ միակողմանի պատժամիջոցներն Իրանի դեմ կարող են ձախողել Թեհրանի միջուկային ծրագրի շուրջ բանակցությունները: «Այժմ, երբ վերջապես լուրջ բանակցություններ են ընթանում, մենք պետք է ամեն ինչ անենք պարզելու համար, թե հնարավոր է արդյոք այս ճանապարհով լուծում գտնելը»,-ասել է Քլինթոնը: Նա համակարծիք է նախագահ Օբամայի հետ, որ « պետք է շանս տալ դիվանագիտությանը, չմոռանալով մյուս հնարավոր տարբերակների մասին»:

Քլինթոնը հիշեցրել է, որ ինքը միշտ կողմ է եղել Իրանի դեմ պատժամիջոցներին, սակայն, այժմ դա այն ճանապարհը չէ, որը կարող է հաջողությամբ պսակվել:

ԱՄՆ վարչակազմը խստորեն քննադատում է մի շարք օրենսդիրների առաջարկը Իրանի դեմ լրացուցիչ պատժամիջոցների մասին: Օբաման բազմիցս է զգուշացրել, որ վետո կդնի նման փաստաթղթի վրա:

Թեհրանը 500 մլն դոլար առաջին փոխանցումն է ստացել իր սառեցված ակտիվներից, հայտնում է ISNA գործակալությունը՝ Իրանի ԱԳ փոխնախարար Աբբաս Արաքչիի վրա հղումով: Հունվարի վերջում ԶԼՄ-ներում տեղեկատվություն հայտնվեց, որ ԱՄՆ-ն ապասառեցրել է 8 մլրդ դոլար կազմող Իրանի ակտիվները:

2013 թվականի նոյեմբերի 24-ին Իրանն ու միջազգային միջնորդների «վեցնյակը» (Ռուսաստան, ԱՄՆ, Չինաստան, Մեծ Բրիտանիա, Ֆրանսիա և Գերմանիա) պայմանավորվել են Իրանի միջուկային ծրագրի կրճատման մասին՝ առավել լիարժեք համաձայնության ակնկալիքով: Մասնավորապես, Իրանը պարտավորվել է դադարեցնել ուրանի 5 տոկոսից բարձր հարստացումը, դադարեցնել պլուտոնիումի ու ցենտրիֆուգերի արտադրությունը, ինչպես նաև թույլ տալ ՄԱԳԱՏԷ-ի տեսուչների մուտքը միջուկային օբյեկտներ: Ի պատասխան Արևմուտքը պետք է ապասառեցնի Իրանի ակտիվների մի մասը:

Ըստ պայմանավորվածության, ի պատասխան ԱՄՆ-ն ու Եվրամիությունը համաձայնվել են ապասառեցնել 4,2 մլրդ դոլար կազմող Իրանի արտերկրի հաշիվները: Պայմանավորվածությունների իրացումը սկսվել է ընթացիկ տարվա հունվարի 20-ին: