Մինսկում ավարտվել են Ռուսաստանի նախագահ Վլադիմիր Պուտինի, Ուկրաինայի նախագահ Պյոտր Պորոշենկոյի, ԳԴՀ կանցլեր Անգելա Մերկելի ու Ֆրանսիայի նախագահ Ֆրանսուա Օլանդի բանակցությունները Ուկրաինայում կարգավորման շուրջ «նորմանդական քառյակի» ձևաչափով:
Գրեթե 16-ժամյա բանակցություններից հետո դուրս գալով լրագրողների մոտ՝ ՌԴ նախագահ Վլադիմիր Պուտինը պարզաբանեց, թե ինչու համաձայնեցումն այդքան երկար տևեց: «Կարծում եմ, որ պատճառն այն է, որ ցավոք, մինչ օրս Կիևը հրաժարվում է ուղիղ շփումներից Դոնեցկի և Լուգանսկի ժողովրդական հանրապետությունների ներկայացուցիչների հետ»,-ասել է նա: «Եվ եթե նրանք ցանկանում են երկարաժամկետ պայմանավորվածության հասնել, հարկ կլինի ուղիղ շփումների գնալ»,-վստահ է Պուտինը: Իսկ առայժմ նա գերադասում է «աշխատել այն պայմաններում, որոնք կան», հայտնում է ՏԱՍՍ-ը:
Մինսկում կայացած բանակցություններում հաջողվել է պայմանավորվել հրադադարի մասին Դոնբասի հակամարտության գոտում փետրվարի 15-ի կեսգիշերից, ծանր սպառազինությունը հետ քաշելու, ինչպես նաև իրավիճակի երկարաժամկետ քաղաքական կարգավորմանն ուղղված միջոցների մասին:
«Ըստ իս, պայմանավորվեցինք շատ բաների մասին, պայմանավորվեցինք հրադադարի մասին փետրվարի 00:00 ժամից: Երկրորդը, որը կարևոր եմ համարում՝ ծանր սպառազինությունը ետ քաշելու մասին «ուկրաինական զորքերի հետ շփման այսօրվա գծից և նախորդ տարվա սեպտեմբերի 19-ին Մինսկի համաձայնություններում նշված գծից»,-ասել է ՌԴ նախագահը:
Նա հավելել է նաև, որ լուծվել է «երկարաժամկետ քաղաքական կարգավորման հետ կապված» հարցերի համալիրը: «Այստեղ մի քանի կետ կա. առաջինը՝ սահմանադրական բարեփոխումն է, որտեղ պետք է հաշվի առնվեն Դոնբասում բնակվող մարդկանց օրինական իրավունքները»,-ասել է նա:
«Հաջորդում են կետերը, կապված Դոնբասի աշխարհազորայինների հետ համաձայնեցված սահմանային հարցերի լուծման հետ՝ հումանիտար հարցեր, այդ տարածքի՝ Դոնեցկի և Լուգանսկի հատուկ կարգավիճակի մասին ավելի վաղ ընդունված օրենքի իմպլեմենտացիա, այսինքն՝ իրագործում»,-ասել է Պուտինը:
«Հորդորում եմ երկու հակամարտող կողմերին որքան հնարավոր է շուտ դադարեցնել արյունահեղությունը և անցնել երկարաժամկետ կարգավորման իրական քաղաքական գործընթացին»,-ասել է նա:
ՌԴ նախագահը հույս է հայտնել, որ հակամարտող կողմերը զսպվածություն կցուցաբերեն մինչ Ուկրաինայում կրակի լրիակատար դադարեցումը՝ խուսափելու համար ավելորդ արյունահեղությունից:
«Խնդիրն այն է, որ Դոնեցկի և Լուգանսկի ներկայացուցիչները պնդում են, որ Կիևի ագրեսիվ գործողություններին ի պատասխան նրանք ոչ միայն զսպեցին Կիևի ուժային կառույցների բանակի գրոհները, այլ նաև, անցնելով հարձակման, շրջափակեցին 6-8 հազարի հասնող խմբավորումը: Նրանք, անշուշտ, ակնկալում են, որ այդ խմբավորումը զենքը վայր կդնի և կդադարեցնի դիմադրությունը»,-ասել է Ռուսաստանի նախագահը բանակցությունների ավարտին: Պուտինը հայտնել է նաև, որ պայմանավորվածություն է ձեռք բերվել Ուկրաինայի արևելքում իրավիճակի գնահատման համար ռազմական փորձագետներ ներգրավելու հարցում:
Իր հերթին Ֆրանսիայի նախագահ Ֆրանսուա Օլանդը հաստատեց, որ բանախոսներին հաջողվել է ընդհանուր հայտարարի գալ Ուկրիանայում կարգավորման և հրադադարի վերաբերյալ: Նա նաև հայտարարել է, որ Մինսկում ձեռք բերված պայմանավորվածությունները «լուրջ հույսեր» են ներշնչում, որ իրավիճակը կկարգավորվի: «Դա լուրջ հույս է, դա մեծ թեթևություն կլինի Եվրոպայի համար»,-ասել է Օլանդը:
Միևնույն ժամանակ նա նշել է, որ պայմանավորվածությունները դեռ պետք է կյանքի կոչել:
Մինչդեռ Լուգանսկի ժողովրդական հանրապետության ղեկավար Իգոր Պլոտնիցկին հայտարարեց, որ ԴԺՀ և ԼԺՀ ղեկավարները ստորագրել են «նորմանդական քառյակի» առաջարկած փաստաթուղթը:
Դոնեցկի ժողովրդական հանրապետության ղեկավար Ալեքսանդր Զախարչենկոն իր հերթին հայտարարեց, որ ստորագրված փաստաթղթի կետերը լրացուցիչ համաձայնեցում են պահանջում:
«Բոլոր կետերը լրացուցիչ համաձայնեցում են պահանջում, ուստի, եթե լինեն խախտումներ, ոչ մի նոր հանդիպում ու հուշագիր չի լինի»,-ասել է նա:
Նա նշել է, որ «Ռուսաստանի նախագահի, Գերմանիայի կանցլերի և Ֆրանսիայի նախագահի երաշխիքների շոնրհիվ մենք այսօր համաձայնագիր ենք ստորագրել, որը, ինչպես հուսով ենք, վերջ կդնի մարտական գործողություններին և թույլ կտա ԴԺՀ և ԼԺՀ-ին ձեռնամուխ լինել խաղաղ շինարարությանը ի նպաստ մեր ժողովրդի»:
«Այդ քայլով մենք կօգնենք փոխվել նաև Ուկրաինային»,-գտնում է ինքնահռչակ հանրապետության ղեկավարը:
«Նորմանդական քառյակի» բանակցությունները գրեթե 16-ժամ տևեցին: Բանակցությունների ավարտին Ֆրանսիայի և ԳԴՀ ղեկավարները մոտեցան Բելառուսի նախագահ Ալեքսանդր Լուկաշենկոյին և շնորհակալություն հայտնեցին աշխատանքի համար պայմաններ ստեղծելու համար:
Զինված հակամարտությունն Ուկրաինայի արևելքում շարունակվում է 2014-ի ապրիլից, որպես Կիևի Մայդանի, Յանուկովիչի պաշտոնանկության ու Ղրիմը ՌԴ-ին միանալու հետևանք: Դոնեցկի ու Լուգանսկի ինքնահռչակ հանրապետությունների ուժերը, վերցնելով իշխանությունը տարածաշրջանում, պահանջում էին ավելի լայն լիազորություններ կամ անկախություն, որին Կիևը պատասխանեց մարտական գործողություններով ու ապստամբությունը ուժով ճնշելու փորձով: Մարտերի արդյունքում կենտրոնական իշխանությունը կորցրեց վերահսկողությունը Դոնեցկի և Լուգանսկի ծրջանների մի մասում, զոհվեց մոտ 4 հազար մարդ, փախստական դարձավ մոտ 800 հազարը:
Փետրվարի 5-ին Կիևում տեղի ունեցան Ուկրաինայի նախագահ Պյոտր Պորոշենկոյի բանակցությունները ԳԴՀ կանցլեր Անգելա Մերկելի և Ֆրանսիայի նախագահ Ֆրանսուա Օլանդի հետ: Այնտեղից Մերկելն ու Օլանդը մեկնեցին Մոսկվա, որտեղ քննարկեցին ուկրաինական ճգնաժամի կարգավորման ուղիները Ռուսաստանի նախագահ Վլադիմիր Պուտինի հետ: Երկու դեպքում էլ բանակցություններն անցել են մամուլի համար փակ դռների հետևում, իսկ հանդիպման ավարտին մասնակիցները հայտարարություններ չեն արել:
