Եվրամիությունում բնակվող 450 մլն մարդկանց ներկայացնող 736 պատգամավոր վաղը՝ Եվրախորհրդարանի ապրիլի 15-ին լիագումար նիստում քննարկելու և քվեարկելու է Հայոց ցեղասպանության վերաբերյալ բանաձևի շուրջ:
Դրան ընդառաջ՝ Եվրախորհրդարանի փոխնախագահ Անտոնիո Տայանին Թուրքիայի նախագահ Ռեջեփ Թայիփ Էրդողանին մեղադրել է Եվրոպայի գծից շեղվելու և «համաարաբական առաջնորդ» դառնալու ձգտումների համար, «Ջումհուրիյեթ»-ին հղումով գրում է Tert.am-ը:
Անդրադառնալով տարածաշրջանում Թուրքիայի ունեցած դերակատարությանը՝ Տայանին նշել է, որ պետք է կանխել «Իսլամական պետություն» խմբավորման՝ տարածաշրջանում առաջնորդ դառնալու ձգտումը. «Դա որքան Եվրոպայի, այդքան էլ Թուրքիայի խնդիրն է: Թուրքիան ի՞նչ պետք է անի: ԵՄ մտնել էր ցանկանում, սակայն մենք գուցե շատ կոշտ կեցվածք ընդունեցինք: Էրդողանը Եվրոպայի գծից շեղվել ու ավելի համաարաբական կեցվածք է ընդունել: Գուցե Էրդողանը երազում է Օսմանյան կայսրությունը դարձյալ կյանքի կոչելո՞ւ մասին: Թուրքիան միշտ Արևմուտքի բարեկամն է եղել, Իսրայելի հետ լավ հարաբերությունների մեջ է եղել: Հուսանք՝ Թուրքիան Եվրոպայի դեմ կեցվածք չի դրսևորի: Մեզ համար ամենակարևորը տարածաշրջանի ապագան է: Իմ կարծիքով՝ Թուրքիան չպետք է արաբական առաջնորդ դառնա»,- ասել է նա:
Մարտի 12-ին Եվրոպական խորհրդարանն ընդունել է մարդու իրավունքների ու ժողովրդավարության հարցով 2013-ի զեկույցը, որի որոշակի պարբերություններ վերաբերում են Հայաստանին: Փաստաթղթով «Հայոց ցեղասպանության 100-րդ տարելիցի նախաշեմին կոչ է արվում ԵՄ անդամ երկրներին ճանաչել Ցեղասպանությունն ու ԵՄ կառույցներին խրախուսվում է նպաստել այդ գործընթացին»: