Եվրամիությունը չի կարող գոյատևել, եթե Մեծ Բրիտանիան դուրս գա վերջինիս կազմից, հայտարարել է Ֆինլանդիայի ֆինանսների նախարար Ալեքսանդր Ստուբը բրիտանացի պաշտոնակից Ջորջ Օսբորնի հետ բանակցություններից հետո:
Օգոստոսի 24-ին Օսբորնը մեկնել է մեկօրյա շրջագայության, որի ընթացքում կայցելի Հելսինկի, Ստոկհոլմ և Կոպենհագեն:
«Մեր մոտեցումը պարզ է` առանց Միացյալ թագավորության Եվրամիություն չի լինի…Ուստի մենք պետք է հաշվի առնենք լուծում պահանջող այն խնդիրները, որոնց մասին խոսում է բրիտանական կառավարությունը»,-մեջբերում է ֆինն նախարարի խոսքը «Ռոյթերս» գործակալությունը:
Ստուբը նշել է, որ ԵՄ-ն պետք է քննարկի եվրոյի գոտու ապագան: «Չի կարելի դուրս թողնել խոշորագույն տնտեսությունները, որոնք չեն մտնում եվրոյի գոտու մեջ, որոշումների կայացման ընթացակարգից»,-ասել է նա, հայտնում է ՌԻԱ Նովոստի գործակալությունը:
Պահպանողականների առաջնորդ և Մեծ Բրիտանիայի վարչապետ Դևիդ Քեմերոնը խոստացել է հանրաքվե անցկացնել ԵՄ-ում Մեծ Բրիտանիայի անդամության շուրջ, ինչպես նաև բանակցել Եվրամիության մյուս առաջնորդների հետ կազմակերպության բարեփոխման մասին: Ինքը Քեմերոնը կողմ է անդամությանը, սակայն այդպիսով ենթադրում է հասնել Եվրամիության բարեփոխումներին, որոնք Լոնդոնն անհրաժեշտ է համարում, առաջին հերթին, Մեծ Բրիտանիային կորցված իշխանական լիազորությունները վերադարձնելու հարցում: Այդ դեպքում, ըստ նրա, բրիտանացիներն ուրախ կլինեն մնալ ԵՄ կազմում: Եթե վարչապետի պահանջը մերժվի, ապա նա ևս կսատարի ԵՄ-ից դուրս գալուն:
Մինչդեռ Շոտլանդիան կարող է անկախության մասին նոր հանրաքվե պահանջել, եթե մեկ այլ հանրաքվեի արդյունքում Մեծ Բրիտանիան որոշի դուրս գալ Եվրամիության կազիմց: Հունիսի 11-ին այսպիսի հայտարարություն է արել Շոտլանդիայի առաջին նախարար Նիկոլա Սթերջենը:
Ըստ Սթերջենի, որը հետևողականորեն կողմ է հանդես գալիս ԵՄ հետ հարաբերությունների պահպանմանը, եթե Շոտլանդիային ստիպեն «իր կամքին հակառակ», հեռանալ կազմակերպությունից, տարածաշրջանային կառավարությունն անկախության մասին նոր հանրաքվեի հայտ կներկայացնի: «Շատ հնարավոր է, որ մեզ հաջողվի հասնել նման քվեարկության անցկացման»,-ասել է նա:
