Եվրոպայի Խորհրդի Խորհրդարանական Վեհաժողովի հուշարձանների մշակույթի գծով առաքելությունը կայցելի Հարավային Կովկաս այս տարվա մայիսին: Այդ մասին հաղորդել է ԵԽԽՎ Գիտության, կրթության եւ մշակույթի հանձնաժողովի մշակութային ժառանգության հարցերով զեկուցող Էդվարդ Օ` Խարան: Նրա խոսքերով, առաքելության այցը տարածաշրջան, որ կայանալու էր անցյալ տարվա աշնանը, չկայացավ եղանակային պայմանների պատճառով, եւ նրանք որոշեցին իրականացնել այդ այցը մինչեւ ամառ: Ըստ Է.Օ`Խարայի, առաքելության անդամները դեռեւս շատ հարցեր չեն համաձայնեցրել: «Իմ գլխավորած առաքելությունը զբաղվում է ոչ թե քաղաքականությամբ, այլ պատմամշակութային հուշարձաններով, դրանց վիճակով, եւ ես երբեք չեմ անում քաղաքական հայտարարություններ, հակառակը, փորձում եմ տարանջատել քաղաքականությունը մշակույթից»,-ընդգծել է նա, հաղորդում է ԱՊԱ-ն:

Հիշեցնենք, որ ԵԽԽՎ առաքելությունը տարածաշրջան է ժամանելու ուսումնասիրելու համար Նախիջեւանում` Հին Ջուղայում հայկական գերեզմանոցի բարբարոսական ոչնչացման փաստը, ինչպես նաեւ ուսումնասիրելու համար Հայաստանի եւ Ադրբեջանի տարածքում գտնվող այլ հուշարձաններ: