Ռուսաստանի Յակուտսկ քաղաքում ընթացող «Ասիայի երեխաներ» մարզական խաղերում Հայաստանի ներկայացուցիչ հրաձիգ Հայկ Բաբայանը դարձել է չեմպիոն:

Հրաձգությունից մասնակցող Բաբայանն 14 մրցակցի մեջ օդամղիչ հրացան, 10մ տղաների պայքարում, խոցելով 620,3 միավոր, 1-ին հորիզոնականով անցել է եզրափակիչ փուլ: Նրան հաջորդել են 607,5 միավորով Բանգլադեշը և 606,2 միավորով Ռուսաստանը ներկայացնող մարզիկները:

Եզրափակչում Բաբայանը գերազանցել է բոլորին և պահպանել դիրքերը` ճանաչվելով չեմպիոն, տեղեկացնում է ՀՀ ազգային օլիմպիական կոմիտեի մամուլի ծառայությունը:

Մարզական խաղերի մասնակիցները մինչև 16 տարեկան երեխաներ են, իսկ Հայկ Բաբայանը դեռ 13 տարեկան է: Նրա անձնական մարզիչն է Անդրանիկ Այվազյանը:

Ռուսաստանի Յակուտսկ քաղաքում հուլիսի 5-ից 17-ը տեղի ունեցող «Ասիայի երեխաներ» մարզական խաղերին այս տարի առաջին անգամ մասնակցում է նաև Հայաստանը : Հայ 15 մարզիկ մրցում է 9 մարզաձևից: