ՀՀ գյուղատնտեսության նախարար Իգնատի Առաքելյանը նոյեմբերի 11-ին ՀՀ ԳՆ սննդամթերքի անվտանգության պետական ծառայության աշխատակազմին է ներկայացրել նորանշանակ ղեկավար Իշխան Կարապետյանին:
Նոյեմբերի 10-ին ՀՀ վարչապետ Կարեն Կարապետյանի որոշմամբ` Հայաստանի Հանրապետության գյուղատնտեսության նախարարության սննդամթերքի անվտանգության պետական ծառայության պետ է նշանակվել Իշխան Կարապետյանը։ Նոյեմբերի 9-ին ՀՀ վարչապետի որոշմամբ՝ Արմեն Հայրապետյանն ազատվել էր ՀՀ գյուղատնտեսության նախարարության ՍԱՊԾ պետի պաշտոնից։
ՍԱՊԾ նորանշանակ ղեկավարն իր խոսքում շնորհակալություն է հայտնել հանրապետության վարչապետին և նախարարին վստահության համար` հավաստիացնելով, որ ամբողջ թիմը կներդնի առավելագույն ջանքեր` խնդիրների արդյունավետ լուծման և համակարգի հետագա զարգացման ու կատարելագործման համար:
Նախարարը նշել է, որ Կարապետյանը պատրաստված և պրոֆեսիոնալ մասնագետ է, քաջատեղյակ է ոլորտին:
«Այսօր ունենք խնդիրներ անասնաբուժության, բուսասանիտարիայի ոլորտում, նաև պետք է ապահովել առավելագույնս խիստ վերահսկողություն սննդամթերքի անվտանգության ապահովման հարցում: Ձեր ամենօրյա աշխատանքը մշտապես հանրության ուշադրության և քննադատության առանցքում է, և ես լիահույս եմ, որ նոր ղեկավարի հետ համատեղ, կշարունակեք ստեղծված հիմքերի վրա բարելավել և զարգացնել Ծառայության աշխատանքների որակը` հասնելով առավել արդյունքների և նոր հաջողությունների»,- նշել է նախարարը:
Մինչև 2012-ը Իշխան Կարապետյանը «ՀայՌուսգազարտ» ՓԲԸ-ում եղել է վարչապետ Կարեն Կարապետյանի տեղակալը: Նաև զբաղեցրել է Հայաստանի փոքր և միջին ձեռնարկատիրության զարգացման ազգային կենտրոնի գործադիր տնօրենի պաշտոնը:
Իշխան Կարապետյանը «Նաթֆուդ» ընկերության տնօրենն է:
