11 հունվարի 2017 - 17:01 AMT
Հարցում. Ամերիկացիների 51%-ը դժգոհ է Թրամփից

ԱՄՆ նորընտիր նախագահ Դոնալդ Թրամփի վարկանիշը զգալիորեն նվազել է 2016-ի նոյեմբերին կայացած ընտրություններից հետո: Այդ են վկայում հարցման արդյունքները, որն անցկացրել է Քվինիփեքսի համալսարանին կից հասարակական կարծիքի ուսումնասիրության կենտրոնը:

Թրամփի գործողություններին հավանություն է տալիս բնակչության 37%-ը: Դա զգալի անկում է նոյեմբերին արձանագրված 44%-ի համեմատ: Ամերիկացիների մեծամասնությունը` 51%-ը դժգոհ է Թրամփից, գրում է Lenta.ru-ն The Independent-ի վրա հղումով:

Գնալով ավելի հոռետեսական է դառնում վերաբերմունքը Թրամփին նաև արտերկրում: Եթե նոյեմբերին 59%-ը կարծում էր, որ ԱՄՆ վիճակը Թրամփի օրոք կբարելավվի, ապա այժմ այդ քանակը 52% է:

Միևնույն ժամանակ հարցվածների 34%-ը (41-ի համեմատ) կարծում է, որ նա ավելի լավ նախագահ կլինի, քան Օբաման: Նմանատիպ անկում է գրանցվել նաև տնտեսության վրա Թրամփի ազդեցության, նրա անձնական ազնվության և ԱՄՆ հասարակությանը միավորելու նրա կարողության գնահատման ցուցանիշով:

Պարբերականը դա կապում է Թրամփի խառնվածքի և քաղաքական ուղղվածության վերաբերյալ ընտրողների մտավախության հետ: Նշվում է, որ առայժմ նրա վարկանիշն ավելի բարձր է, քան ընտրություններից առաջ էր` 34%:

Թրամփն ԱՄՆ նախագահ է ընտրվել 2016-ի նոյեմբերի 8-ին կայացած ընտրությունների արդյունքում: Նա ստացել է ընտրիչների ձայների մեծամասնությունը, չնայած, որ քվեների ընդհանուր քանակով զիջում էր իր մրցակից Հիլարի Քլինթոնին: Պետության նորընտիր նախագահը կստանձնի պաշտոնը հունվարի 20-ին: