Ֆրանսիայի հատուկ նշանակության ուժերը Մալիի հյուսիսում ձերբակալել են ենթադրյալ մահապարտ ահաբեկիչների: Նրանց կասկածում են երկրի մայրաքաղաք Բամակոյում աշխատանքն ավարտած ֆրանս-աֆրիկյան գագաթնաժողովի մասնակիցների դեմ ահաբեկչություն նախապատրաստելու մեջ: Գագաթնաժողովին մասնակցել է նաև Ֆրանսիայի նախագահ Ֆրանսուա Օլանդը, հայտնում է ՌԻԱ Նովոստին «Ֆրանս Պրեսի» վրա հղումով:
«Ֆրանսիական հատուկ նշանակության ուժերը Մալիի հյուսիսում ահաբեկիչների են ձերբակալել, որոնք մտադիր էին հարձակում գործել Բամակոյում»,-ասել է աղբյուրը Մալիի անվտանգության ծառայությունում:
Ձերբակալվածների հստակ թիվը չի նշվում: Ձերբակալվածների մոտ հայտնաբերվել է բջջային հեռախոս, որից «հրաժեշտի հաղորդագրություն է ուղարկվել ծնողներին»:
Ֆրանսիա-Աֆրիկա գագաթնաժողովին, որը կայացել է Բամակոյում հունվարի 13-14-ը, մասնակցել են Ֆրանսիայի նախագահ Ֆրանսուա Օլանդն ու ավելի քան 30 աֆրիկյան պետության նախագահներ:
