Իրաքը պատրաստ է որպես միջնորդ հանդես գալ Պարսից ծոցում առաջացած դիվանագիտական ճգնաժամի կարգավորման հարցում: Այդ մասին հայտարարել է երկրի նախագահ Ֆուադ Մաասումը, հայտնում է ՏԱՍՍ-ը Al-Hayat-ի վրա հղումով:
«Մենք պատրաստ ենք մեր ավանդը բերել տեսակետների մերձեցման հարցում և որպես միջնորդ հանդես գալ եղբայրական եկրների միջև տարաձայնությունների հարթման համար: Մենք կարծում ենք, որ խնդիրներն ու հակամարտությունները կարելի է լուծել երկխոսության միջոցով»,-ասել է Իրաքի նախագահը:
Ավելի վաղ Իրաքի վարչապետ Հեյդար ալ Աբադին հայտարարել էր, որ Բաղդադը այդ տարաձայնությունների մասնակից չի հանդիսանում և պահպանում է լավ հարաբերությունները բոլոր երկրների հետ:
Արաբական մի շարք պետություններ՝ Բահրեյնը, Սաուդյան Արաբիան, Եգիպտոսն ու ԱՄԷ-ն, խզել են դիվանագիտական կապերը Քաթարի հետ: Ավելի ուշ նրանց միացան Եմենը, Լիբիան, Մալդիվները:
Կատարի և հարևան երկրների միջև տարաձայնություններ առաջացան Պարսից ծոցի երկրների և ԱՄՆ գագաթնաժողովից հետո Էր Ռիադում, երբ Կատարի լրատվական գործակալությունը երկրի էմիրի անունից ելույթ հրապարակեց Իրանի հետ հարաբերություններ հաստատելու անհրաժեշտության մասին:Մինչդեռ հենց հանդիպման ժամանակ Սաուդյան իշխանությունները բոլոր հյուրերի անունից դատապարտեցին Թեհրանին վերջինիս «թշնամական քաղաքականության» համար և համարժեք քայլերով սպառնացին:
Ավելի վաղ հայտնի դարձավ, որ ԱՄՆ նախագահ Դոնալդ Թրափմն առաջարկել է ԱՄՆ պետքարտուղար Ռեքս Թիլերսոնին միջնորդ դառնալ Կատարի շուրջ ստեղծված իրավիճակում: Նա պետք է միջնորդ դառնա Կատարի և մյուս արաբական երկրների միջև, որոնք խզել են դիվանագիտական կապերն այդ երկրի հետ:
