Հունիսի 28-ին Երևանի 12 համարի երթուղին սպասարկող երթուղային չի կարողացել բարձրանալ մի քաղաքացի՝ հաշմանդամություն ունեցող երեխայի և նրա համար նախատեսված սայլակի հետ:
«Այսօր աղջիկս թոռնիկիս հետ՝ հաշմանդամի սայլակով մոտեցել են 12 համարի երթուղու սկզբում կանգնած 1337 պետ համարանիշի կիսադատարկ երթուղայինին, բացել են դուռն ու չեն հասցրել բարձրանալ: Վարորդ կոչվածը դուռը բաց թողնելով քշել է ու գոռացել. «Կարողա էս ձեր համար բեռնատար ա», - գրել է Հասմիկ Սողոմոնյանը ֆեյսբուքյան իր էջում:
Դեպքի հետ կապված Երևանի քաղաքապետարանի հասարակայնության և լրատվության հետ կապերի վարչության պետ Արթուր Գևորգյանը տեղեկացրեց PanARMENIAN.Net-ին, որ նույն օրը՝ հունիսի 28-ին, փոխանցել է դեպքի մասով տեղեկատվությունը Երևանի քաղաքապետարանի աշխատակազմի տրանսպորտի վարչության պետին:
Վերջինս 12 համարի երթուղին սպասարկող մասնավոր ընկերության սեփականատերի ու երթուղայինի վարորդի հետ հանդիպմանն է ուղարկել վարչության ներկայացուցիչներին:
«Հանդիմումը տեղի է ունեցել, և ըստ դրա արդյունքների՝ օրենքով սահմանված կարգով, մեղավորը պատասխանատվության կենթակվի: Թե դա ինչ պատասխանատվություն կլինի՝ նկատողություն կամ այլ բան՝ կտեղեկացնեմ մի փոքր ուշ», - ասաց Գևորգյանը:
