Կովկասի մահմեդականների վարչության նախագահ Ալլահշուքյուր Փաշազադեի կոչը մահմեդականներին՝ միավորվել Արցախի հարցի լուծման համար, ոչ այլ ինչ է, քան՝ Արցախի խնդրին կրոնական երանգ հաղորդելու անթույլատրելի փորձ: Այդ մասին ՀՀԿ ԳՄ նիստից հետո հայտարարել է ՀՀԿ խոսնակ, ԱԺ փոնախագահ Էդուարդ Շարմազանովը:
Նա շեշտել է, որ Արցախյան հիմնահարցին կրոնական երանգ տալու Ադրբեջանի հոգևոր ու աշխարհիկ ղեկավարության բոլոր ջանքերը դատապարտված են անհաջողության՝ նշելով, որ Իրանի ու այլ երկրների հավասարակշռված մոտեցումը խոսում է այդ կարևորագույն փաստի մասին, հայտնում է Aysor.am-ը:
«Սա ձախողված փորձ է, որովհետև Արցախյան հիմնահարցը կրոնական երանգ չունի, Արցախյան հիմնահարցում կրոնական երանգ փնտրելն անբարոյականություն է: Դրա վառ ապացույցն Իրանի Իսլամական Հանրապետության հավասարակշռված դիրոքորոոշումն է Արցախյան հիմնահարցում», - ասել է նա:
Նա հավելել է, որ Արցախի ժողովրդի պայքարը բացառապես մարդու իրավունքների պաշտպանության պայքար է: «Դա պայքար է ազատության, անկախության, որը ուշ թե շուտ պսակվելու է հաջողությամբ: Արցախի երկնակամարում պետք է ծածանվի եռագույնը, ուզեն Ադրբեջանում, թե չուզեն, դա է ցույց տալիս պատմությունը»,-ասել ՀՀԿ խոսնակը:
Ստամբուլում տեղի ունեցած «Երուսաղեմ. Աստծո լույսով լուսավորված քաղաք» միջազգային համաժողովում Կովկասի մահմեդականների վարչության նախագահ, Շեյխ ուլ իսլամ Ալլահշուքյուր Փաշազադեն կոչ է արել բոլոր մահմեդականներին միավորվել արցախյան հիմնախնդրի լուծման համար: «Մենք կոչ ենք անում ամբողջ մահմեդական աշխարհին միավորվել ղարաբաղյան հիմնախնդրի լուծման շուրջ», - ասել էր Փաշազադեն:
