Լիտվայի Սեյմասը 2-րդ ընթերցմամբ վավերացրել է ՀՀ-ԵՄ Համապարփակ և ընդլայնված գործընկերության համաձայնագիրը՝ 89 կողմ, 1 ձեռնպահ, 0 դեմ ձայների հարաբերակցությամբ։ Այդ մասին հայտնել է Լատվիայում, Լիտվայում և Էստոնիայում ՀՀ դեսպան Տիգրան Մկրտչյանը Twitter-ի միկրոբլոգում:

«էստոնիայից և Լատվիայից հետո Լիտվան ԵՄ անդամ երրորդ պետությունն է, որ վավերացնում է այս պատմական համաձայնագիրը»,-ասվում է դեսպանի գրառման մեջ։

Ավելի վաղ Լիտվայի կառավարությունն էր հավանություն տվել Հայաստանի և Եվրամիության միջև Համապարփակ և ընդլայնված գործընկերության համաձայնագրին:

Հայաստանի և Եվրամիության միջև Համապարփակ և ընդլայնված գործընկերության նոր համաձայնագիրը ստորագրվել է 2017 թվականի նոյեմբերի 24-ին: