ԱԺ ԵԼՔ խմբակցության ղեկավար Լենա Նազարյանը, խորհրդարանում կառավարության հետ հարցուպատասխանի ընթացքում անդրադառնալով հոկտեմբերի 2-ին ԱԺ շենքի մոտ հանրահավաքի մասնակիցների հասցեին ՀՀԿ-ական պատգամավորներ Միհրան Պողոսյանի և Արայիկ Գրիգորյանի (Ավշարի Արայիկ) թիկնապահների հնչեցրած հայհոյանքներին, հարցրել է ՀՀ վարչապետ Նիկոլ Փաշինյանին, թե արդյոք տեղյակ է այդ միջադեպին և ինչ դիրքորշում ունի:
Ի պատասխան, Փաշինյանն ասել է, որ սա նշանակում է՝ որոշ դեպքերում իրավապահ մարմինները լավ չեն կատարել իր՝ օլիգարխներին և նրանց թիկնապահներին ասֆալտին պառկեցնելու հրահանգը:
«Եթե պատշաճ կերպով այդ հրահանգները կատարված լինեին, ապա այդ հայհոյանքները չէին հնչի, կարծում եմ, որ իրավապահ մարմինները կլրացնեն իրենց բացթողումը: Մեր ուժերը կարող են չբավարարել ապահովելու ոմանց՝ Երևանում հանգիստ քայլելու իրավունքը», - ասել է Փաշինյանը՝ հավելելով, որ իր տեղեկություններով այդ միջադեպով կան բերման ենթարկվածներ:
Հոկտեմբերի 2-ին ԱԺ տարածքում ՀՀ ԱԺ պատգամավորներ Միհրան Պողոսյանի և Արայիկ Գրիգորյանի ի թիկնապահները հայհոյել են խորհրդարանի շենքի մոտ հանրահավաքի մասնակիցներին: Միջադեպից հետո բերման են ենթարկվել Գրիգորյանի կողմնակիցները:
Ուշադրություն. տեսանյութում հնչում են հայհոյանքներ:
