Կենտրոնական ընտրական հանձնաժողովն ամփոփել է դեկտեմբերի 9-ին կայացած արտահերթ խորհրդարանական ընտրությունների նախնական արդյունքները:

Հայաստանի Հանրապետական կուսակցությունը հավաքել է ընտրողների ձայների 4.70%-ը. գործող Ընտրական օրենսգրքով` խորհրդարան մտնելու համար անհրաժեշտ է ձայների 5%:

ՀՀ նոր կառավարության ձևավորումից ի վեր` վարչապետի պաշտոնակատար Նիկոլ Փաշինյանի որոշմամբ, ընտրական օրենսդրության բարեփոխումների համար հանձնաժող է ստեղծվել, որը խորհրդարանական և արտախորհրդարանական ուժերի հետ քննարկել է ԸՕ նոր նախագիծը:

Նախագծով վերացվում էին կոալիցիաների ձևավորման սահմանափակումները: Կուսակցական բազմակարծության ապահովման նպատակով՝ ընտրվելու նվազագույն շեմը իջնում էր 4%-ի` կուսակցությունների, իսկ դաշինքի դեպքում` 6%-ի: Բացի այդ, նախագծով ներկայիս 3-ի փոխարեն ԱԺ-ում խմբակցությունների քանակը նվազագույնը 4-ն էր սահմանվում:

Սակայն Հայաստանի Հանրապետական կուսակցությունը երկու անգամ տապալել է ընտրական օրենսգրքի նոր նախագիծը՝ պատճառաբանելով, որ այն մշակվել է առանց խորհրդարանական ուժերի ներգրավման և օրենսգրքի շուրջ քաղաքական կոնսենսուս չկա և չի լինելու:

ՀՀԿ-ականները նշում էին նաև, որ նախագիծը չի ենթարկվել Վենետիկի հանձնաժողովի փորձաքննությանը, մինչդեռ հանձնաժողովը ողջունել էր ԸՕ բարեփոխումները՝ հաշվի առնելով երկրում քաղաքական իրադրությունը:

Ժամը 07:25-ի դրությամբ մշակված են բոլոր 2010 ընտրատեղամասերից ստացված տվյալները. ըստ այդմ՝ առաջին տեղում «Իմ քայլը» դաշինքն է՝ 70.43 % ձայներով: Դաշինքի օգտին քվեարկել է 884,456 ընտրող: