Թուրքիայի նախագահ Ռեջեփ Թայիփ Էրդողանն առաջարկել է փոխել Ստամբուլի Սբ Սոֆիայի տաճարի կարգավիճակը՝ վերածելով այն մզկիթի: Այդ մասին նա հայտարարել է TGRT հեռուստաալիքի եթերում:
«Սբ Սոֆիայի կարգավիճակը թանգարանից կարող է փոխվել մզկիթի: Եվ բոլոր դավանանքների հետևորդները կկարողանան այն այցելել անվճար»,-ասել է Էրդողանը, հայտնում է ՌԲԿ-ն:
Կոստանդնուպոլսի Սբ Սոֆիայի տաճարն ավելի քան 1000 տարի եղել է ամենամեծ քրիստոնեական եկեղեցին աշխարհում: Թուրքերի կողմից Կոստանդնուպոլսի գրավումից և Բյուզանդիայի անկումից հետո տաճարը վերածվեց մզկիթի, սակայն 1934-ից շինությունն Աթաթուրքի հրամանով թանգարան դարձավ և ներառվեց ՅՈւՆԵՍԿՕ-ի Համաշխարհային ժառանգության ցանկում:
2018-ի մարտին Էրդողանը Ղուրանից տողեր ընթերցեց Սբ Սոֆիայում: Նա ընթերցեց «Ստամբուլը նվաճողներին» նվիրված հատվածը, ինչը դատապարտվեց Աթենքի կողմից:
