ԱԳՆ-ն հորդորում է Ռուսաստանում գտնվող ՀՀ քաղաքացիներին, Հայաստան վերադառնալիս, օգտվել օդային հաղորդակցությունից, քանի որ Վրաստանը մարտի 18-ից փակել է մուտքը բոլոր արտասահմանցիների համար։
Հյուպատոսական վարչության պետ Արտակ Ավետիսյանը տեղեկացրել է, որ չվերթեր կան Ռոստովից, Պյատիգորսկից, Մինվոդիիդ և Մոսկվայից։
ԱԳՆ խոսնակ Աննա Նաղդալյանն էլ նշել է, որ սահմանափակվել է ՌԴ և ՀՀ ցամաքային և օդային կապը, սակայն, ՌԴ-ում գտնվող ՀՀ քաղաքացիներն ու նրանց ընտանիքների անդամները, նույնիսկ եթե նրանք ՀՀ քաղաքացի չեն, կարող են վերադառնալ բացառապես օդային ուղիներով։
Նաղդալյանը հավելել է նաև, որ ԵՄ անդամ երկրները որոշել են 30 օր ժամկետով, որը կարող է երկարաձգվել, արգելեն արտասահմանցիների մուտքը ԵՄ երկրներ։ ՀՀ քաղաքացիները պետք է ձեռնպահ մնան ԵՄ երկրներ այցելությունից։
30 օր ժամկետով արգելափակվել է օտարերկրացիների մուտքը ԵՄ+ տարածք՝ այսինքն ԵՄ, շենգենի երկրներ, Շվեյցարիա, Իռլանդիա, Նորվեգիա, Լիխտենշտեյն։ Մարտի 19-ին Շարմ էլ Շայխ-Երևան վերջին չվերթն է, որով այնտեղ գտնվող ՀՀ քաղաքացիները կարող են վերադառնալ։
Ավելի վաղ հայտնի դարձավ, որ ՀՀ քաղաքացիների մուտքը Վրաստանի տարածք արգելված է բոլոր ճանապարհներով (հայ-վրացական, ռուս-վրացական, թուրք-վրացական սահմաններով, նաև օդային ու ծովային ճանապարհներով)։ Հայաստանի և Վրաստանի կառավարությունների միջև ձեռք բերված պայմանավորվածության համաձայն` երկու երկրի միջև բեռնափոխադրումներն իրականացվում են անխափան:
