Հարթագյուղի սբ Հովհաննես մատուռ-սրբավայրն ամբողջական և հիմնավոր կվերակառուցվի։ Մայիսի 1-ին Գուգարաց թեմի առաջնորդ գերաշնորհ Տեր Սեպուհ արք. Չուլջյանը մի խումբ հուշարձանագետ-ճարտարապետների հետ այցելել է մատուռ-սրբավայր:
Փետրվարի 5-ին սրբավայրի տանիքը քամուց ու փոթորկից պոկվել էր:
Սրբազան հոր հրավերով սբ Հովհաննես ժամանած հուշարձանագետ-ճարտարապետները, Ստեփան Նալբանդյանի գլխավորությամբ, տեղում զննել են սրբավայրի ընդհանուր վիճակը, կատարել ուսումնասիրություններ, նկարահանում և չափագրում, հայտնում է Գուգարաց թեմի դիվանի ֆեյսբուքյան էջը։
Ճարտարապետներին հանձնարարվել է պատրաստել վերակառուցման ու վերականգնման նախագիծ և նախահաշիվ:
Արդեն կան անձինք, ՀՀ-ից և ԱՄՆ-ից, որոնք իրենց նյութական աջակցությունը ցուցաբերելու պատրաստակամություն են հայտնել:
Նախկինում ևս մի քանի անգամ քամուց մատուռի տանիքը վնասվել էր, վառվող մոմերի բռնկումից էլ այն հրդհվել էր, այրվել էին սրբապատկերները: Սրբազան մատուռը մշտապես վերականգնվել է անհատների օժանդակությամբ ու նախաձեռնությամբ, սակայն, առանց մասնագիտական միջամտության և ուղղորդման:
