ՀՀ պաշտպանության նախարար Դավիթ Տոնոյանը տարածաշրջանային անվտանգությանը և պաշտպանության բնագավառում հայ-հունական երկկողմ գործակցությանն առնչվող հարցեր է քննարկել ՀՀ-ում Հունաստանի դեսպան Էվանգելոս Տուրնակիսի և նորանշանակ ռազմական կցորդ, գնդապետ Գերասիմոս Ավլոնտիսի հետ:
Տոնոյանը ներկայացրել է տարածաշրջանում որոշ դերակատարների ծավալած ապակառուցողական գործողությունների հետևանքով լարվածության աճի հնարավոր զարգացումները: Դեսպան Տուրնակիսն իր հերթին անդրադարձել է Միջերկրական ծովի արևելյան հատվածում տիրող իրավիճակին։
Հանդիպման ընթացքում կարևորվել են համավարակով պայմանավորված սահմանափակումների վերացումից հետո գործակցության միջոցառումների անհապաղ վերսկումը, ինչպես նաև բարձր մակարդակի փոխայցերի և քննարկումների իրականացումը։
Վերջին շրջանում Արևելյան Միջերկրականում Թուրքիայի ծավալած էներգակիրների որոնողական աշխատանքների պատճառով լարված հույն-թուրքական հարաբերություններն առավել լարվել են հունական տարածքային ջրերի մոտ թուրքական Oruç Reis նավի կողմից սեյսմիկ հետազոտություններ իրականացնելու պատճառով։
