Ադրբեջանը կրկին հարվածել է Շուշիի Սբ Ղազանչեցոց եկեղեցուն՝ նոր ավերածություններ պատճառելով։ Այդ մասին դեպքի վայրից հայտնել է Sputnik Արմենիայի թղթակիցը։

Հարվածի պահին եկեղեցում ռուս լրագրողներ են եղել։ Նրանց թվում կան տուժածներ։«Կան տուժածներ։ Այդ թվում՝ ռուս լրագրողներ»,- նշում է աղբյուրը։ Տեղեկությունը հաստատել է «Կառավարության տեղեկատվական-վերլուծական կենտրոն» ՊՈԱԿ-ի տնօրեն Հովհաննես Մովսիսյանը։

«Էլի վիրավոր լրագրող. Շուշիում եկեղեցու մոտ հրետակոծության արդյունքում վիրավորվել է արտասահմանցի լրագրող, նրան տեղափոխել են հիվանդանոց»,-գրել է նա` հավելելով, որ նրանցից մեկի վիճակը ծանր է,նախնական տվյալով՝ ռուս լրագրողին վիրահատում են։

Ավելի ուշ հայտնի դարձավ, որ ադրբեջանական զինված ուժերի կողմից Շուշիի Սուրբ Ղազանչեցոց եկեղեցու երկրորդ հրթիռակոծության արդյունքում ծանր վիրավորում է ստացել ռուս լրագրող Յուրի Պետրովիչ Կատյոնոկը, ում կյանքի համար այժմ պայքարում են արցախցի բժիշկները։ Այդ մասին հայտնել է Արցախի տեղեկատվական շտաբը։

Հոկտեմբերի 8-ին հակառակորդն արդեն մեկ անգամ հարվածել էր եկեղեցուն՝ վնասելով այն։ Այդ պահին նկուղում երեխաներ և կանայք են եղել։

Արցախի նախագահ Արայիկ Հարությունյանը գրել էր, որ Սբ Ղազանչեցոցը ևս թիրախ դարձավ ահաբեկիչների կողմից։

Սբ Ամենափրկիչ Ղազանչեցոց Եկեղեցին Շուշիի մայր տաճարն է, կառուցված 1868-1887 թթ.։ Գանձասարից հետո Արցախի երկրորդ կարևորագույն հոգևոր կենտրոնն է։ Ղարաբաղյան պատերազմի ժամանակ այստեղ էր գտնվում ադրբեջանցիների «ԳՐԱԴ» հրթիռային համակարգի պահեստը։ Շուշիի ազատագրումից հետո տաճարն ամբողջովին վերանորոգվել էր և գործում էր՝ սկսած 1998 թվականից։

Ադրբեջանը սեպտեմբերի 27-ի վաղ առավոտյան Արցախի ուղղությամբ սկսել է օդային և հրթիռային հարձակում՝ թիրախավորելով թե ռազմական օբյեկտներ, թե քաղաքացիական ենթակառուցվածքներ, այդ թվում՝ Ստեփանակերտում։ Հրետակոծություններից վիրավորվել են նաև տեղացի և ֆրանսիացի լրագրողներ։ ՀՀ-ում և Արցախում ռազմական դրություն է հայտարարված։