Մարտի 22-ին Ֆլորիդայի Սբ.Դավիթ հայկական եկեղեցում տեղի կունենա Անտոնինա Մահարու «Իմ Ոդիսականը» անգլերեն լեզվով գրքի շնորհանդեսը: Գիրքը գրվել է անցյալ դարի յոթանասունական թվականներին, բայց հրատարակվել է շատ ավելի ուշ: «Խորհրդային տարիներին ես վախենում էի հրապարակել գիրքը: Եւ միայն 2003թ.` Գուրգեն Մահարու հարյուրամյակի պատվին Գրողների Միության Նախագահ Լեւոն Անանյանի օգնությամբ «Իմ Ոդիսականը» առաջին անգամ հրատարակվեց»,- PanARMENIAN.Net-ի թղթակցի հետ զրույցում ասել է գրողը:

1945թ. 22-ամյա Անտոնինա Պովելայտիտին` Վիլնյուսի համալսարանի ուսանողուհին, մեղադրվեց «Հանուն Լիտվայի անկախության» գաղտնի խմբավորմանը մասնակցելու մեջ եւ հինգ տարով աքսորվեց Սիբիրի ճամբար: Այնտեղ էլ Անտոնինա Միխայլովնան ծանոթացավ իր ապագա ամուսնու` քաղբանտարկյալ Գուրգեն Մահարու հետ: