Խորհրդարանական մեծամասնությունը որոշել է, որ արտահերթ ընտրույթունները կանցկացվեն համամասնական ընտրակարգով։ Այդ մասին վարչապետ Նիկոլ Փաշինյանն հայտարարել է Ազգային ժողովում։
Նա ասել է, որ բոլոր քննարկումներում հարցրել է իր գործընկերներին, թե ինչ կարծիք ունեն ընտրակարգի վերաբերյալ՝ ռեյտինգայինով, թե առանց դրա։
Վարչապետը նշել է նաև, որ խոսակցություններից պարզ է դարձել՝ «Բարգավաճ Հայաստան» և «Լուսավոր Հայաստան» խմբակցությունների համար երկու տարբերակն էլ ընդունելի են։
«Նրանք այս հարցն, այսպես ասած, թողնում են խորհրդարանական մեծամասնության հայեցողությանը։ Այսինքն՝ իրենք խնդիր չունեն, վարկանիշայինը լինի, թե՝ ոչ», - ասել է վարչապետը։
Փաշինյանը հավելել է, որ խորհրդարանական մեծամասնությունը, քննարկելով այդ հարցը արտախորհրդարանական ուժերի և քաղաքացիական հասարակության հետ, որոշում է կայացրել գնալ ընտրությունների համամասնական ընտրակարգով՝ առանց վարկանիշային ցուցակի։
Ավելի վաղ հայտնի դարձավ, որ Վենետիկի հանձնաժողովը վերջին լիագումար նիստում որոշել է հրատապ ընթացակարգով քննարկել Ընտրական օրենսգրքի վերաբերյալ հարցը և ներկայացնել եզրակացություն մինչև ապրիլի 20-ը։ Այդ մասին հայտարարել է Ազգային ժողովի «Իմ քայլը» խմբակցության պատգամավոր Վլադիմիր Վարդանյանը:
