Մարտի 23-ին ՀՀ ԱԳ նախարար Էդվարդ Նալբանդյանը հանդիպում ունեցավ մի խումբ հրեա եւ արաբ լրագրողների հետ, որոնք Հայաստան են ժամանել Եվրոպական Միության կողմից հովանավորվող «Լրագրողների ցանց» ծրագրի շրջանակներում: Ինչպես PanARMENIAN.Net-ին հաղորդել են ՀՀ ԱԳՆ մամլո ծառայությունում, Հայաստան են ժամանել մոտ 30 արաբ եւ հրեա լրագրողներ: Հանդիպման ընթացքում Էդվարդ Նալբանդյանը ներկայացրեց Հայաստանի եւ Միջին Արեւելքի երկրների միջեւ ձեւավորված հարաբերությունները եւ դրանց խորացման հեռանկարները: Հանդիպմանը, որին ներկա էին Միջին Արեւելքի առաջատար լրատվամիջոցների ներկայացուցիչներ, արծարծվեցին Հայաստանի արտաքին քաղաքականության, արցախյան հիմնախնդրի եւ հայ-թուրքական հարաբերությունների կարգավորմանն առնչվող բազմաթիվ հարցեր: