Մարտի 25-ին ՀՀ ԱԳ նախարար Էդվարդ Նալբանդյանն ընդունեց ԵԱՀԿ Մինսկի խմբի համանախագահ, ԱՄՆ պետքարտուղարի տեղակալի օգնական Մեթյու Բրայզային: Մեթյու Բրայզան Էդվարդ Նալբանդյանին փոխանցեց ԱՄՆ պետքարտուղար Հիլարի Քլինթոնի ուղերձը, որտեղ պետքարտուղարը, ջերմությամբ հիշելով ՀՀ նախագահ Սերժ Սարգսյանի հետ վերջերս ունեցած հեռախոսազրույցը, անդրադարձել է հայ-ամերիկյան բարեկամական հարաբերություններին, տարածաշրջանային հարցերին եւ հայ-թուրքական հարաբերությունների կարգավորման հնարավորություններին: Ուղերձում պետքատուղար Քլինթոնը պատրաստակամություն է հայտնել ամենայն աջակցություն ցուցաբերելու ղարաբաղյան հիմնախնդրի խաղաղ կարգավորման գործընթացին:

Հանդիպման ընթացքում Էդվարդ Նալբանդյանն ու Մեթյու Բրայզան քննարկեցին արցախյան հիմնահարցի բանակցային գործընթացին առնչվող հարցեր, հաղորդում է ՀՀ ԱԳՆ մամլո ծառայությունը: