ՌԴ Պետական դուման փետրվարի 15-ին ընդլայնված նիստում կքննարկի Դոնեցկի Ժողովրդական Հանրապետության (ԴԺՀ) և Լուգանսկի Ժողովրդական Հանրապետության (ԼԺՀ) ճանաչման անհրաժեշտության վերաբերյալ ՌԴ նախագահին դիմելու հարցը։ Այդ մասին հայտարարել է Պետդումայի նախագահ Վյաչեսլավ Վոլոդինը։
Ընդլայնված նիստում ներկայացվելու է որոշման երկու նախագիծ՝ մեկը ընդունվելու դեպքում կուղարկվի ՌԴ նախագահ Պուտինին, իսկ մյուսը՝ ԱԳՆ և այլ կառույցներ՝ ուսումնասիրության և կարծիքների համար, գրում է «Պարլամենտսկայա գազետան»։
Քվեարկությունը ռեյտինգային է լինելու՝ որ տարբերակը շատ ձայն հավաքի, այն էլ կընդունվի։
Վոլոդինն ասել է, որ Վաշինգտոնը լարվածություն է ստեղծում, եվրոպական երկրների հետ զենք է մատակարարում Ուկրաինային, Կիևը չի կատարում Մինսկի համաձայնությունները։ «Այդ ամենը սպառնալիքներ և ռիսկեր է պարունակում ԴԺՀ-ում ԼԺՀ-ում ապրող մեր քաղաքացիների և հայրենակիցների համար»,-ասել է նա։
Ավելի վաղ ՌԴ Կոմունիստական կուսակցության պատգամավորները խորհրդարանի ստորին պալատի քննարկմանն էին ներկայացրել երկու չճանաչված հանրապետությունները ճանաչելու անհրաժեշտության վերաբերյալ նախագահին դիմելու որոշման նախագիծը։
